ھەسەدە: یەکگرتنا لەشکەری د چارچۆڤەیا دیالۆگەکا فەرمی دە ھات نیقاشکرن
فەرمانداریا ھێزێن سووریەیا دەمۆکراتیک (ھەسەدێ) و رایەدارێن حکوومەتا شامێ د جڤینەکا فەرمی دە، دۆسیایا ئەنتەگراسیۆنا ھێزێن لەشکەری و چاوانیا یەککرنا شیانێن بەرەڤانیێ گۆتووبێژ کرن. ھەر دو ئالیان ل سەر بەردەوامکرنا ھەڤدیتنان ل ھەڤ کر ھەتا کو دگھیژن ئەنجامەکە داوی و بەرفرەھ.
ناڤەندا راگھاندنێ یا ھەسەدێ ب داخویانیەکێ ئاشکەرە کر، فەرماندارێن وان د چارچۆڤەیا دیالۆگەکا فەرمی دە، ل گەل رایەدارێن حکوومەتا شامێ روونشتنە. ھاتە راگھاندن کو ھەر دو ئالیان ل سەر بەردەوامکرنا جڤینان ل ھەڤ کریە دا کو نیقاشێن ل سەر مژارێن لەشکەری بگھیژن ئەنجامەکا داوی.
شاندەیا ھەسەدێ کو ژ فەرماندارێ گشتی مەزلووم عەبدی و ئەندامێن فەرمانداریا گشتی سۆزدار حاجی و سیپان حەمۆ پێک دھات، دوھ 4ێ چلەیێ ل شامێ لگەل رایەدارێن حکوومەتا شامێ جڤیابوو و مژارا سەرەکە “ئەنتەگراسیۆنا (یەکبوونا) لەشکەری” و شێوازێ رێخستنکرنا ھێزێن چەکدار د بن سیوانا دەولەتێ دە بوو.
فەرھاد شامی: ‘گوھ نەدن گۆتەگۆتان’
بەرپرسێ ناڤەندا راگھاندنێ یا ھەسەدێ فەرھاد شامی د داخویانیەکێ دە ژ بۆ رۆژنامەڤانان دەستنیشان کربوو، نیقاشێن ل سەر چاوانیا رێخستنکرنا ھێزان بەردەوامن. شامی ھەروھا ھشیاری دا کو ھەموو ئاگاھیێن کو ل دەرڤەیی راگھاندنا فەرمی د مەدیا و تۆرێن جڤاکی دە تێنە بەلاڤکرن، راستیێ نیشان نادن.
شامی تەکەز کر کو ھوورگولی و ئەنجامێن ڤان شێوران تەنێ پشتی تەمامبوونا پرۆسەیێ دێ ب ئاوایەکی فەرمی لگەل رایا گشتی وەرن پارڤەکرن.
