یەنەکێ نزار ئامێدی ژ بۆ پۆستا سەرۆککۆمارێ ئیراقێ بەربژار کر

 یەکیتیا نیشتیمانی یا کوردستانێ (یەنەکێ) راگھاند، وان نزار ئامێدی، وەزیرێ بەرێ یێ ژینگەھێ و ئەندامێ سەرکردایەتیا پارتیا خوە، وەکی بەربژارێ فەرمی ژ بۆ پۆستا سەرۆککۆماریا ئیراقێ دەستنیشان کریە.

بەردەڤکێ یەکیتیا نیشتیمانی یا کوردستانێ (یەنەکێ) کاروان گازنەیی ئیرۆ 5ێ چلەیا 2026ێ، ل سەر ھەژمارا خوەیا فەرمی یا مەدیایا جڤاکی ئاشکەرە کر کو پارتیا وان ب فەرمی بریار دایە کو نزار ئامێدی ببە بەربژارێ وان ژ بۆ پۆستا سەرۆککۆماریا ئیراقێ.

نزار ئامێدی کییە؟

نزار محەمەد سەید محەمەد، کو د قادا سیاسی دە وەکی “نزار ئامێدی” تێ ناسکرن، د سالا 1968ێ دە ل قەزایا ئامێدیێ یا پارێزگەھا دھۆکێ ژ داییک بوویە. ئەو خوەدی ئەزموونەکە درێژ و دەولەمەندە د ناڤا سازیێن دەولەتا ئیراقێ و دپلۆماتیک دە.

ئاستا پەروەردەھیێ و زمان:

نزار ئامێدی ئەندازیارێ مەکانیکێ یە و بەشا ئەندەزیاریێ یا زانینگەھا مووسلێ قەداندیە. ئەو زمانێن کوردی و عەرەبی دزانە.

ئامێدی د ناڤا دو دەھسالێن بۆری دە د پۆستێن ھەری بلند یێن دەولەتێ دە جھ گرتیە:

– وەزیرێ ژینگەھێ: د کابینەیا حکوومەتا محەمەد شیاع سوودانی دە ژ سالا 2022 ھەتا داویا 2024ێ وەکی وەزیرێ ژینگەھێ کار کریە.

– شێورمەندێ سەرۆککۆماریێ: د ناڤبەرا سالێن 2005 و 2022ێ دە شێورمەندێ ھەر سێ سەرۆککۆمارێن بەرێ (جەلال تالەبانی، فوئاد مەعسووم و بەرھەم سالح) بوویە.

– پۆستێن پارتیتی: نھا ئەندامێ پۆلیتبورۆیا یەنەکێ و بەرپرسێ ئۆفیسا پۆلیتبورۆیێ یا پارتیا خوە ل بەغدایێیە. ھەروھا ئەندامێ ھەڤپەیمانیا برێڤەبرنا دەولەتێیە.

نوونەرتیا ناڤدەولەتی

نزار ئامێدی د گەلەک قادێن ناڤنەتەوەیی دە نوونەرتیا ئیراقێ کریە. ئەو سەرۆکاتیا شاندەیا ئیراقێ د لووتکەیا کەشووھەوایێ یا جۆپ28 دە ل ئیماراتێ (2023) و د جڤینا ژینگەھێ یا نەتەوەیێن یەکبوویی دە ل کینیایێ (2023) کریە. ھەروھا د گەلەک لووتکەیێن عەرەبی و جڤینێن نەتەوەیێن یەکبوویی یێن ل نیو یۆرک و جەنەڤرەیێ دە ئامادە بوویە.

ئەڤ پێنگاڤا یەنەکێ د دەمەکێ دە تێ کو ل گۆری دەستوورێ پشتی ھلبژارتنا دەستەیا سەرۆکاتیا پارلامەنێ، دڤێت د ناڤا 30 رۆژان دە سەرۆککۆمارێ نوو وەرە ھلبژارتن. تێ چاڤەرێکرن کو ناڤێ نزار ئامێدی د پێڤاژۆیا دانووستاندنێن ل گەل ئالیێن دن یێن کوردی و ئیراقی دە ببە مژارەکە سەرەکە.