ل کرماشانێ 2 برا د خوەنیشاندانان دە هاتن کوشتن

ل باژارێ کرماشانێ یێ رۆژهلاتێ کوردستانێ د ئەنجاما گولەرەشاندنا هێزێن ئەولەهیێ دە دو برایێن جوان ژیانا خوە ژ دەست دا.

خوەنیشاندانێن کو ل ئیران و رۆژهلاتێ کوردستانێ ژ بەر کریزا ئابۆری دەست پێ کرنە جانێ مرۆڤان دستینن.

ل ئیرانێ ئامارا خوەنیشاندانێن کو ژ 28ێ کانوونا پێشین یا 2025ان ڤە ل دژی بلندبوونا زێدە یا نرخێ دراڤان و بهایان ددۆمن گران دبە.

هەری داوی هات راگهاندن کو ل پارێزگەها کرماشانێ دو برا ژ ئالیێ هێزێن ئەولەهیێ ڤە هاتنە کوشتن.

ل گۆری زانیاریێن ئاژانسا نووچەیان یا کوردپایێ، د دەما موداخەلەیا هێزێن ئەولەهیێ دە دو برایێن ب ناڤێ رەسوول کەدیڤەریان و رەزا کەدیڤەریان هاتنە هەدەفگرتن.

هات دیارکرن کو رەسوول کەدیڤەریانێ 17 سالی ل جهێ بوویەرێ جانێ خوە ژ دەست دایە.

برایێ وی رەزا کەدیڤەریانێ 20 سالی ژی ب گرانی بریندار بوویە و شەڤا یەکشەمێ ل نەخوەشخانەیا تەلەقانیێ یا کو لێ دهات دەرمانکرن جانێ خوە ژ دەست دایە.

رێخستنێن مافێن مرۆڤان راگهاند کو تەرمێن هەر دو جوانان هین رادەستی مالباتێن وان نەهاتنە کرن.