سزایەکێ دن بۆ سەلاحادین دەمیرتاش ھات برین

 ب ئیدیعایا “سڤکاتی ب سەرۆککۆماری کریە”، دادگەھەکا ترکیەیێ سالەک و 5 مەھ و 15 رۆژ سزایێ زیندانێ ل ھەڤسەرۆکێ گشتی یێ ھەدەپێ یێ بەرێ سەلاحەدین دەمیرتاش بری.

دادگەھا 14ێ یا سززایێن گران یا مێرسینێ ئیرۆ 6ێ چلەیێ بریارا خوە یا دەربارێ دۆزا سەلاحەدین دەمیرتاش دە ئەشکەرە کر. دادگەھێ ژ بەر ئاخافتنێن وی یێن سالێن 2015 و 2016ێ یێن ل باژارێن مێرسین و ئامەدێ، سزا بۆ دەمیرتاش بری.

سەلاحەدین دەمیرتاش، کو نھا ل گرتیگەھا ئەدرنەیێ گرتییە، خواست کو ب خوە بەشداری روونشتنا دادگەھێ ببە. لێ بەلێ دادگەھێ ب ھنجەتا “ئەولەھیێ” داخوازا وی رەد کر و تەنێ پارێزەرێن وی د روونشتنێ دە ئامادە بوون.

داخوازا پارێزەران ھات رەدکرن

د روونشتنێ دە پارێزەرێن دەمیرتاش ژ بۆ کو بەرسڤا داخوازا دۆزگەر بدن و پاراستنا خوە ئامادە بکن، دەم خوەستن. لێ دادگەری ئەڤ داخواز قەبوول نەکر و گۆت کو بەرێ وەخت ھاتبوو دایین. ل سەر ڤێ یەکێ پارێزەران دیار کر کو مافێ “دادگەهکرنا دادپەروەرانە” ھاتیە بنپێکرن و داخوازا گوھەرتنا دادوەری کرن، لێ ئەڤ داخوازا وان ژی نەھات پەژراندن.

9 سالن د گرتیگەھێ دەیە

سەلاحەدین دەمیرتاش ژ مەھا مژدارا 2016ێ ڤە ل گرتیگەھا ئەدرنەیێ تێ راگرتن و ھەتا نھا ب دەھان دۆزێن جودا ل دژی وی ھاتنە ڤەکرن. د گرنگترین گەشەدانا حقووقی دە، د مەھا گولانا 2024ێ دە د “دۆزا کۆبانێ” دە 42 سال سزایێ زیندانێ بۆ دەمیرتاش ھاتبوو برین.

تەڤی کو دادگەھا مافێن مرۆڤان یا ئەورۆپایێ (DMME) گەلەک جاران بریارا ئازادکرنا وی یا لەزگین دایە و دۆزێن ل دژی وی وەکی “سیاسی” پێناسە کرنە، لێ دەولەتا ترکیەیێ ھەتا نھا ل گۆری ڤان بریاران تەڤنەگەریایە.

گومانێن ل سەر ‘پێڤاژۆیا ئاشتیێ’

ئەڤ سزایێ نوو د دەمەکێ دە تێ کو ل ترکیەیێ نیقاشێن ل سەر دەستپێکرنا “پێڤاژۆیەکا نوو یا ئاشتیێ” جارەکە دن گەرم بوونە. چاڤدێرێن سیاسی بالێ دکشینن کو بەردەوامیا سزادانا سیاسەتمەدارێن کورد، گومانان ل سەر داخویانیێن رایەدارێن حکوومەتێ یێن دەربارێ ئاشتی و دەمۆکراسیێ دە هێژ زێدەتر دکە.