د ئێریشێن ئارتێشا سووریەیێ یێن ل سەر تاخێن کوردی یێن حەلەبێ 5 کەس ھاتنە کوشتن
د ئەنجاما پەڤچوونێن لەشکەری یێن د ناڤبەرا ھێزێن حکوومەتا سووریەیێ و ھێزێن سووریەیا دەمۆکراتیک (ھەسەدێ) دە ل باژارێ حەلەبێ پێنج کەس ھاتنە کوشتن، کو چار ژ وان وەلاتیێن سڤیل بوون.
ئەڤ پێشکەتنا مەیدانی یا خەتەر پشتی چەند مەھان ژ سستی و بێھێڤیبوونا دانوستاندنێن سیاسی یێن د ناڤبەرا ھەر دو ئالیان دە تێ، کو بوویە سەدەما چێبوونا ئالۆزیێ ل دەڤەرێ.
چاڤکانیێن مەدیایێ ئاماژەیێ ددن کو، ھەر دو ئالی ھەڤدو ب دەستپێکرنا ئێریشان تۆمەتبار دکن. ھێزێن سووریەیا دەمۆکراتیک (ھەسەدێ) راگھاندیە کو، درۆنەکا وەزارەتا بەرەڤانیێ یا دەمکی تاخا شێخ مەقسوودێ یا حەلەبێ کریە ئارمانج و د ئەنجامێ دە وەلاتیەکێ سڤیل ھاتیە کوشتن و دو کەسێن دن ژی بریندار بوونە.
ھەسەدێ ھەروەسا گۆتیە کو، ھێزێن ئارتێشا سووریەیێ ب چەکێن گران دەڤەرێن دێر حافرێ و دەردۆرا بەنداڤا تشرینێ بۆمبەباران کرنە، ژ بەر وێ یەکێ ئەو مافێ بەرسڤدانێ ژ بۆ پاراستنا دەڤەرێن خوە رەوا دبینن.
ژ ئالیەکێ دن ڤە رایەدارێن خوەجھی یێن حەلەبێ ھەسەدێ ب بنپێکرنا پەیمانان تۆمەتبار دکن و دبێژن: “ژ بەر ئارمانجکرنا دەڤەرا چارچۆڤەیا شەیھانێ، ئەندامەکێ وەزارەتا بەرەڤانیێ ھاتیە کوشتن و سێ کەسێن دن ژی بریندار بوونە.”
ھەروەسا ئاژانسا سانایێ یا فەرمی یا نووچەیان ژی بەلاڤ کریە کو، د ئەنجاما تۆپبارانکرنا ئاڤاھیێن ئاکنجیبوونێ یێن تاخا مەیدانێ دە، سێ وەلاتیێن سڤیل ھاتنە کوشتن کو دو ژ وان ژن بوون.
ئەڤ ئالۆزی تەنێ دو رۆژان پشتی لدارخستنا گەرەکا نوو یا دانوستاندنان ل شامێ تێ، کو ب ئاوایەکێ بێ ئەنجام ب داوی بوو. مژارا سەرەکی یا وان ھەڤدیتنان تەڤلھەڤکرنا ھێزێن ھەسەدێ د ناڤ ئارتێشا سووریەیێ دە بوو، لێ بەلێ چ لھەڤکرنەکا کۆنکریتی نەھات بدەستخستن.
ھەر چەند مەزلووم عەبدی و ئەحمەد شەرع ل رۆژا 10ێ ئادارا سالا بۆری ژ بۆ یەککرنا دەزگەھان پەیمانەک ئیمزە کربوو و بریار بوو کو ھەتا داویا سالا 2025ێ ئەو پەیمان ھاتبا بجیھانین، لێ جوداھیا نەرینێن ھەر دو ئالیان رێ ل بەر پێشڤەچوونا وێ پێڤاژۆیێ گرتیە.
کوردێن رۆژئاڤایێ کوردستانێ داخوازا پەرگالەکا نەناڤەندی و بنەجھبوونا مافێن خوە د دەستوورێ دە دکن، لێ شامێ ھەتا نھا بەرسڤا وان داخوازێن وان نەدایە. ئەڤ پەڤچوون د دەمەکێ دەیە کو زەختێن ناڤنەتەوەیی و ھەرێمی باندۆرەکا راستەراست ل سەر پاشەرۆژا تێکلیێن د ناڤبەرا ھەسەدێ و حکوومەتا سووریەیێ دە ھەبوویە و ناڤبەر ناڤبەر دبە سەدەما سەرھلدانا شەر و پەڤچوونان ل حەلەبێ و دەڤەرێن دن.
