ھێزێن ئەولەکاریا ھوندرین ل گرێ کاستێلۆیێ ئێریشەکا ھێزێن چەکدار شکاند

ھێزێن ئەولەکاریا ھوندرین یێن حەلەبێ (ئاسایش)ێ یێن گرێدایی ھەسەدێ راگھاند کو، وان کاریە بزاڤەکا چەکدارێن گرێدایی حکوومەتا شامێ ژ بۆ سەر گرێ کاستێلۆیێ بشکینن.

ل گۆری راگھاندنا ناڤەندا راگھاندنێ یا ھێزێن ئەولەکاریا ھوندرین یێن حەلەبێ (ئاسایش)یێن گرێدایی ھەسەدێ، ھێزێن وان ئیرۆ رۆژا چارشەمبێ، 7/1/2026ێ د پووچکرنا بزاڤا یەکێ یا دەربازبوونا چەکدارێن حکوومەتا شامێ ژ بۆ سەر گرێ کاستێلۆیێ دە سەرکەفتی بوون.

ناڤەندا راگھاندنێ یا ھێزێن ئەولەکاریا ھوندرین ئاماژە ژی دا کو، ئەو ئێریش دەمژمێر 3:00 پشتی نیڤرۆیا ئیرۆ ب رێیا بکارئانینا تانکان ھاتیە کرن. ئەولەکاریا حەلەبێ ئەشکەرە ژی کریە کو، زرارەکا مەزن گھیشتیە وان ھێزان و نەچار مانە کو برەڤن و تەرمێن کوشتیێن خوە ژی ل پاش خوە ل دەڤەرێ ھشتنە.

ناڤەندا ناڤبری ئاماژە ژی دا کو، ھێزێن گرێدایی حکوومەتا شامێ ل سەر تۆپبارانکرنا وێ تاخێ ب رێیا بکارئانینا تانک و تۆپان بەردەوامن. بۆمبەبارانان دەڤەرێن لێرامۆن، شێھان، سریان و دەردۆرێن وێ ڤەگرتنە.

ھێزێن ئەولەکاریا ھوندرینێن حەلەبێ ھەروەسا راگھاند کو، د ئەنجاما وان بۆمبەبارانان دە، ھەتا نھا دو وەلاتیێن سڤیل بریندار بوونە.