سەرۆک بارزانی: شەر و توندووتیژیا نھا ل حەلەبێ جھێ دلگرانیەکا زۆرە

سەرۆک بارزانی راگھاند: “ئەڤ رەوشا مەترسیدار و شەر و توندووتیژیا کو نھا ل باژارێ حەلەبێ ھەیە، جھێ دلگرانیەکا زۆرە و مەترسی ل سەر ژیانا خەلکێ سیڤیل و وەلاتیێن بێتاوان چێ کریە و گەفا قرکرنا ئەتنیکی ل دژی کوردان ل وێ دەڤەرێ ھەیە.”

سەرۆک بارزانی ئیرۆ رۆژا چارشەمب، 7/1/2026ێ ل سەر شەر و ئالۆزیێن کو ل تاخێن کوردان یێن حەلەبێ ھەنە پەیامەک بەلاڤ کر.

پەیاما سەرۆک بارزانی وەهایە:

ب ناڤێ خودایێ مەزن و دلۆڤان

گوھەرتنێن سیاسی یێن ل سووریەیێ دەرفەتەکا باش بوو ژ بۆ دیتنا چارەسەریەکا گونجایی کو مافێن رەوایێن گەلێ کورد ل سووریەیێ بێن بەرچاڤگرتن و ھەمی پرسگرێک ژی بێن چارەسەرکرن. ژ بۆ ڤێ ئارمانجێ، مە لگەل ھەمی ئالیان گەلەک بزاڤ کر کو دڤێت ھەمی پرسگرێک و ناکۆکی ب رێیا دیالۆگێ و ب ئاوایەکێ ئاشتیانە بێن چارەسەرکرن.

لێ بەلێ ئەڤ رەوشا مەترسیدار و شەر و توندووتیژیا کو نھا ل باژارێ حەلەبێ ھەیە، جھێ گەلەک دلگرانیێیە و مەترسی ل سەر ژیانا خەلکێ سیڤیل و وەلاتیێن بێتاوان چێ کریە و گەفا قرکرنا ئەتنیکی ل دژی کوردان ل وێ دەڤەرێ ھەیە.

ئەز داخوازێ ژ دەستھلاتدارێن سووریەیێ دکم کو ناکۆکیێن سیاسی نەکن ناکۆکیێن نەتەوەیی و نەیێ ھشتن کو وەلاتیێن کورد ژ بەر ڤان ئارێشە و پرسگرێکێن ل ھەرێما حەلەبێ، راستی زەخت و توندووتووژیێ، دەرخستنا ژ جھ و وارێن باب و کالێن خوە و قرکرنا ئەتنیکی بێن. ھەروھا ئەز داخوازێ ژ ئالیێن کوردی و ب تایبەتی (ھەسەدێ) دکم کو چ ژ دەستێ وان بێ بکن ژ بۆ راوەستاندنا شەر و پەڤچوونان و رێگرتنا ل خوینرژیا زێدەتر، و ھەردو ئالی ژی ژ بۆ چارەسەرکرنا پرسگرێکان، کار ژ بۆ گرتنا رێیا دیالۆگ و دانووستاندنان بکن. نابە ھەبوونا ناکۆکیێن سیاسی ببە سەدەما وێ یەکێ کو ژیانا خەلکێ سیڤیل بکەڤە بن مەترسیێ و قرکرنا ئەتنیکی ل دژی گەلێ کورد روو بدە، ئەڤ تاوانەکا ل دژی مرۆڤاھیێیە و ئەنجامێن مەترسیدار دێ ژ وێ دەرکەڤن.

مەسعوود بارزانی

7/1/2026ێ