ئیلھام ئەحمەد: ئەم ئامادە نە ھێزێن خوە ژ شێخ مەقسوودێ بۆ رۆژھلاتێ فراتێ ڤەگوھێزن
بەرپرسا تێکلیێن دەرڤە یا رێڤەبەریا خوەسەر یا باکور و رۆژھلاتێ سووریەیێ راگھاند کو، ئەو ژ بۆ پاراستنا جانێ وەلاتیان پێشوازیا ڤەگوھەستنا ھێزێن خوە ژ شێخ مەقسوود و ئەشرەفیەیێ بۆ رۆژھلاتێ چەمێ فراتێ دکن، ب شەرتێ کو پاراستنا ھوندرین و ئەنجوومەنا خوەجھی ل گۆری پەیمانا 1ێ نیسانێ ژ شێنیان رە بێن گارانتیکرن.
بەرپرسا تێکلیێن دەرڤە یا رێڤەبەریا خوەسەر یا باکور و رۆژھلاتێ سووریەیێ ئیلھام ئەحمەد ئیرۆ رۆژا شەمبی، 10/1/2026ێ، ل سەر تۆرا جڤاکی یا Xێ پەیامەک بەلاڤ کر و تێ دە گۆت کو، رێڤەبەریا وان پێشوازیا پێشەنگیا ھێزێن ناڤنەتەوەیی ژ بۆ ڤەگوھاستنا ھێزێن وان ژ بۆ رۆژھلاتێ چەمێ فراتێ دکە.
د پەیامەکێ دە کو ژ بۆ رایا گشتی ھاتیە ئاراستەکرن، ئیلھام ئەحمەد تەکەز کر کو پاراستنا جانێ سڤیلان ل ھەر دو تاخێن شێخ مەقسوود و ئەشرەفیەیێ سەرپشکا کارێن وانە.
بەرپرسا تێکلیێن دەرڤەیا رێڤەبەریا خوەسەر رۆن ژی کر: “ئەم پێشنیارا ھێزێن ناڤبەینکارێن ناڤنەتەوەیی ژ بۆ ڤەگوھەستنا وان ھێزێن ل شێخ مەقسوودێ ژ بۆ رۆژھلاتێ فراتێ ب ئاوایەکێ ئارام پێشوازی دکن.”
ئیلھام ئەحمەد د دەرحەقا شەرتێن ڤەگوھەستنێ دە گۆت کو، رازیبوونا وان ب وێ یەکێ ڤە گرێدایییە کو، دڤێت ھەبوونا پاراستنا کوردێن ناڤخوەیی و مانا ئەنجوومەنێن خوەجھی ژ بۆ شێنیێن وان ھەر دو تاخان بهێت گارانتیکرن، ئەو ژی ل گۆری بەندێن پەیمانا 1ێ نیسانێ.
ئەڤ داخویانیا ڤێ بەرپرسا رێڤەبەریا خوەسەر د دەمەکێ دەیە کو دانوستاندنێن ناڤنەتەوەیی ژ بۆ ئارامکرنا رەوشا حەلەبێ و پاراستنا شێنیێن کورد ل وێ دەڤەرێ بەردەوامن.
کۆمێن چەکدار یێن گرێدایی حکوومەتا سووریەیێ ئەڤ چەند رۆژن کو ئێریشێن لەشکەری ل سەر ھەر دو تاخێن کوردان، ئەشرەفیە و شێخ مەقسوود، ل حەلەبێ دانە دەستپێکرن. وان ب ئاوایەکی بێسەروبەر ھەر دو تاخێن کوردان بۆمبەباران کرنە، وەسا ژی ھەژمارەکا مەزنا شێنیێن وان تاخان ئاوارە بوونە و ھن ژ وان ژی بوونە قوربانی.
