مەسەدە حکوومەتا سووریەیێ ب بنپێکرنا ئاگربەستا حەلەبێ تۆمەتبار دکە

ئەنجوومەنا سووریەیا دەمۆکراتیک (مەسەدێ) راگھاند کو، ئارتێشا عەرەبی یا سووریەیێ ئاگربەست ل تاخێن شێخ مەقسوود و ئەشرەفیەیێ یێن باژارێ حەلەبێ بنپێ کریە و ل سەر تۆپبارانکرنا دەڤەرێن سڤیلان ب چەکێن گران بەردەوامە.

ھەڤسەرۆکێ نڤیسینگەھا تێکلیێن گشتی یا مەسەدێ حەسەن محەمەد عەلی ئیرۆ رۆژا شەمبی، 10/1/2026ێ، ئەشکەرە کر کو، ھێزێن حکوومەتا سووریەیێ پابەندی پەیمانا شەری یا ئاگربەستێ نەبوون.

حەسەن محەمەد عەلی ئاماژە ژی دا کو، نەخوەشخانەیا خالد فەجرێ ژ بەر تۆپبارانێن ب تانک و مووشەکان ب سەر برینداران دە ھاتیە خوارێ. د ئەنجاما ڤان ئێریشان دە د دەما ئاگربەستێ دە، ھەژمارەکا سڤیلان ھاتیە کوشتن کو د ناڤ دە دو پزیشک و پێنج خۆرتێن ئەشرەفیەیێ ھەنە.

رایەدارێ مەسەدێ ھەروەسا راگھاند کو، وان نھا لگەل وەلاتێن ئامەریکا و فرانسایێ تێکلیەکا بەردەوام ھەیە، ژ بۆ چێکرنا زەختەکا ناڤنەتەوەیی ب مەرەما راوەستاندنا تاڤلێ یا شەر و گارانتیکرنا ئاگربەستێ. ئارمانجا ڤان بزاڤان دەستپێکرنا نیقاشانە ژ بۆ دەستنیشانکرنا چارچۆڤەیەکا ئیداری یا تایبەتی ژ بۆ وان تاخێن حەلەبێ یێن کو پرانیا شێنیێن وان کوردن.

د دەمەکێ دە کو پەڤچوون ل تاخا شێخ مەقسوودێ ب توندی بەردەوامن، ئارتێشا سووریەیێ راگھاندیە کو، وان تەڤاھیا تاخا ئەشرەفیەیێ کۆنترۆل کریە. ئەڤ پشتی وێ یەکێ تێ کو، ھێزێن کوردان رەد کریە کو تاخا شێخ مەقسوودێ بەردن و جدی نە کو بەرەڤانیێ ژ وان دەڤەران بکن.

کۆمێن چەکدارێن گرێدایی حکوومەتا سووریەیێ ئەڤ چەند رۆژن کو ئێریشێن لەشکەری ل سەر ھەر دو تاخێن کوردان، ئەشرەفیە و شێخ مەقسوود، ل حەلەبێ دانە دەستپێکرن. وان ب ئاوایەکی بێسەرووبەر ھەر دو تاخێن کوردان بۆمبەباران کرنە، وەسا ژی ھەژمارەکا مەزن یا شێنیێن وان تاخان ئاوارە بوونە و ھندەک ژ وان ژی بوونە قوربانی.