رێڤەبەریا خوەسەر: بۆمبەبارانکرنا نەخوەشخانەیان تاوانا شەر و بنپێکرنا قانوونێن ناڤنەتەوەیییە
ژ بەر بۆمبەبارانا بەردەواما ل سەر نەخوەشخانەیا خالد فەجر ژ ئالیێ ئارتێشا عەرەبی یا سووریەیێ ڤە، رێڤەبەریا خوەسەر یا باکور و رۆژھلاتێ سووریەیێ ئیرۆ رۆژا شەمبی، 10/1/2026ێ، بانگەکا بلەز ل سەر گەفا کۆمکوژیێ ل تاخا شێخ مەقسوود یا حەلەبێ پێشکێشی جڤاکا ناڤنەتەوەیی کر.
رێڤەبەریا خوەسەر د راگھاندنەکێ دە گۆت کو، نەخوەشخانەیا خالد فەجر ژ رۆژا یەکێ یا ئێریشان ڤە ب رەنگەکێ راستەراست و بەرنامەکری ھاتیە ئارمانجکرن. تەکەز ژی کر کو، بۆمبەبارانکرنا ڤێ نەخوەشخانەیێ وەکی دەزگەھەکا سڤیل دەربازی خانەیا “تاوانا شەر” و بنپێکرنەکا ئەشکەرە یا قانوونێن ناڤنەتەوەیی دبە.
د بەشەکا دن یا وێ داخویانیێ دە ھاتیە: “بەردەوامیا ڤێ رەوشێ ژیانا نەخوەش، بریندار و پزیشکان دخە خەتەرێ و دبە سەدەما ئاستەنگیا خزمەتێن ساخلەمیێ، کو ئەڤ ژی دبە سەدەما ئیحتیمالا روودانا کۆمکوژی و کارەساتێن مرۆڤی.”
رێڤەبەریا خوەسەر ھایداری ژی دا کو، بەردەوامیا بۆمبەبارانان دبە سەدەما بێپاربوونا سڤیلان ژ مافێ چارەسەرکرنێ و زێدەبوونا ھەژمارا قوربانیان.
رێڤەبەریا خوەسەر ل داویێ ژی بانگ ل نەتەوەیێن یەکگرتی و ھێزێن ناڤنەتەوەیی کر کو، ب لەز دەستتێوەردانێ ژ بۆ راوەستاندنا ئێریشان و دابینکرنا پاراستنێ ژ بۆ نەخوەشخانەیان و تیمێن بژیشکی بکن، دا کو بکارن بێ ئاستەنگی کارێن خوە بدۆمینن.
کۆمێن چەکدارێن گرێدایی حکوومەتا سووریەیێ ئەڤ چەند رۆژن کو ئێریشێن لەشکەری ل سەر ھەر دو تاخێن کوردان، ئەشرەفیە و شێخ مەقسوود، ل حەلەبێ دانە دەستپێکرن. وان ب ئاوایەکی بێسەرووبەر ھەر دو تاخێن کوردان بۆمبەباران کرنە، وەسا ژی ھەژمارەکا مەزن یا شێنیێن وان تاخان ئاوارە بوونە و ھن ژ وان ژی بوونە قوربانی.
