ئاساییشا حەلەبێ: مە 3 تانکێن ملیسێن شامێ تەقاندن
ھێزێن ئەولەکاریا ھوندرین (ئاساییش)یا حەلەبێ راگھاند، وان 3 تانکێن ملیسێن گرێدایی ئارتێشا سووریەیێ تەقاندنە. ئەڤ تانک دەما کو نەخوەشخانەیا خالد فەجر یا ل شێخ مەقسوود تۆپباران دکرن، ھاتن تێکبرن.
ناڤەندا راگھاندنێ یا ئاساییشا حەلەبێ ئیرۆ 10ێ چلەیێ زانیاریێن ھەری داوی پارڤە کرن. ل گۆری داخویانیێ، ملیسێن شامێ ب تانکان نەخوەشخانەیا “خالد فەجر” یا ل رۆژئاڤایێ شێخ مەقسوود تۆپباران دکرن. ھێزێن ئاساییشێ د ئەنجاما ئۆپەراسیۆنەکا سەرکەفتی دە ھەر 3 تانکێن ئێرشکار تەقاندن و پووچ کرن.
ھات راگھاندن، نھا ل کۆلانێن شێخ مەقسوود شەرەکی پر دژوارێ سینگ ب سینگ بەردەوام دکە. ملیسێن شامێ ب ئاوایەکی بێسەرووبەر تاخێن نشتەجھبوونێ تۆپباران دکن و درۆنێن وان ژی ناڤەندێن تەندورستیێ ئارمانج دگرن.
ھێزێن ئەولەکاریا ھوندرین دەستنیشان کر کو ئەو ل ھەمبەری ڤان ئێرشان د ناڤا بەرخوەدانەکا مەزن دە نە و ژ بۆ پاراستنا ژیانا سڤیلان ل ھەر دەرێ بەرسڤێ ددن ئێرشکاران.
ژ ئالیەکی دن ڤە، رەوانگەھا سووری بۆ مافێن مرۆڤان (SOHR) بەلاڤ کر، دەردۆرا نەخوەشخانەیا “خالد فەجر” کو تەکانە ناڤەندا تەندورستیێ یا تاخێیە، راستی تۆپبارانا گران یا ھێزێن “حکوومەتا دەمکی” ھات.
سۆھرێ راگھاند، نەخوەشخانە ب سڤیل و بریندارێن کو ژ تۆپبارانا بێسەرووبەر رەڤیانە داگرتییە. کەسێن د ناڤا نەخوەشخانەیێ دە ئاسێ مانە، داخواز دکن کو ئارمانجگرتنا سازیێن تەندورستیێ دەملدەست وەرە راوەستاندن، ژ بەر کو ژیانا ب سەدان کەسان د بن مەترسیەکە راستەراست دەیە.
ل گۆری سۆھرێ، ھێزێن حکوومەتا دەمکی ناھێلن ئامبولانس و تیمێن ھاوارھاتنێ دەرباسی تاخێ ببن دا کو بریندار بێن ڤەگوھاستن. ئەڤ یەک مەترسیا کارەساتەکامرۆڤی یا هێژ مەزنتر لگەل خوە تینە. د ئەنجاما تۆپبارانا ل سەر قادێن نشتەجھبوونێ دە، گەلەک مال و وەساییتێن سڤیلان شەوتینە و زیانەکا مەزن گھیشتیە ملکێن تایبەت.
ھەڤدەم لگەل ڤێ کریزێ، دەستەیا ئۆپەراسیۆنان یا ئارتێشا سووریەیێ ئیرۆ شەمبیێ 10ێ چلەیا 2026ێ، داخویانیەک بەلاڤ کر و تێ دە راگھاند، ھەموو ئۆپەراسیۆن یێن وانێن لەشکەری یێن ل ھوندرێ تاخا شێخ مەقسوود راوەستیانە.
ل گۆری داخویانیێ، ژ دەمژمێر 15:00ێ پشتی نیڤرۆ ڤە ئۆپەراسیۆن ب تەمامی ھاتنە بداویکرن. ئارتێشێ دیار کر کو ئەو دەست ب رادەستکرنا سازیێن حکوومی و تەندورستیێ ژ بۆ دەزگەھێن فەرمی یێن دەولەتێ دکن و ھێزێن وان قۆناغ ب قۆناغ ژ کۆلانێن تاخێ ڤەدکشن.
