ژ بەر ئێریشا ل سەر نەخوەشخانەیێن شێخ مەقسوود، بانگا دەستێوەردانا ناڤدەولەتی تێ کرن
خەباتکارێن تەندورستیێ یێن رۆژئاڤایێ کوردستانێ ئێرشێن ل سەر تاخێن شێخ مەقسوود و ئەشرەفیێ شەرمەزار کرن. د داخویانیێ دە ھات ئەشکەرە کرن کو رێڤەبەرێ نەخوەشخانەیەکێ و برازیێ وی ھاتنە کوشتن و ھەموو ناڤەندێن تەندورستیێ ژ خزمەتێ دەرکەتنە.
دەستەیا تەندورستیێ ل باژارێ رەقایێ ب داخویانیەکێ بال کشاند سەر کارەساتا مرۆڤی یا ل تاخێن کوردان (شێخ مەقسوود و ئەشرەفیێ) یێن حەلەبێ. داخویانی ژ ئالیێ جیگرا ھەڤسەرۆکان تۆلین حەمۆ و ھەڤسەرۆک محەمەد نوور شەباب ڤە ھات خوەندن.
د داخویانیێ دە ھات دەستنیشانکرن کو شەرێ ل شێخ مەقسوود و ئەشرەفیێ کەتیە رۆژا 5ێ و ژیانا دەهان هەزار سڤیلان د خەتەرەیێ دەیە. دەستەیێ ب توندی بۆمبەبارانا ل سەر نەخوەشخانەیا خالد فەجر شەرمەزار کر و دیار کر کو ئەڤ ئێرشە سیستەماتیکن، دا کو پەرگالا تەندورستیێ ب تەمامی فەلەج بکن. نھا ژیانا زێدەتری 70 بریندارێن د ھوندرێ نەخوەشخانەیێ دە، ژ بەر تۆپبارانا گران د بن مەترسیەکا مەزن دەیە.
یەک ژ ئاگاھیێن ھەری گران یێن داخویانیێ، نووچەیا کوشتنا خەباتکارێن تەندورستیێ بوو. ھات راگھاندن کو د دەما سەردەگرتنا تاخا ئەشرەفیێ دە، ئەندامێن ئارتێشا سووریەیێ رێڤەبەرێ نەخوەشخانەیا ئۆسمان، عەدنان عۆسمان و برازیێ وی دەرمانساز عەلی عۆسمان ب ئاوایەکی ھۆڤیتی کوشتنە. ھات دەستنیشانکرن کو ئەڤ ھەر دو خەباتکار ژ بۆ خزمەتا نەخوەشان، ل نەخوەشخانەیێ بوون.
دەستەیا تەندورستیێ راگھاند، ژ بەر ئێرشێن بەردەوام و دۆرپێچا کو ب مەھانە بەردەوام دکە، ل تاخێن شێخ مەقسوود و ئەشرەفیێ ھەموو نەخوەشخانەیێن گشتی و تایبەت ژ خزمەتێ دەرکەتنە. نەبوونا سۆتەمەنی، دەرمان و پێدڤیێن پزیشکی کارەساتەکا مرۆڤی ئانیە ئاستەکە خەتەرناک.
دەستەیا تەندورستیێ بێدەنگیا جڤاکا ناڤدەولەتی شەرمەزار کر و بانگا لەزگین ل نەتەوەیێن یەکگرتی، رێخستنا تەندورستیێ یا جیھانێ (WHO) و خاچا سۆر کر.
ھەروھا گۆت: “ئەم داخواز دکن کو ئەڤ بێدەنگی وەرە شکاندن و ل دژی ڤان تاوانێن شەری یێن ب زانەبوون، تەدبیرێن لەزگین وەرن گرتن. پێدڤییە کو پاراستنا ناڤەندێن بژیشکی ل گۆری پەیمانا جەنەڤرەیێ وەرە میسۆگەرکرن و ئێرش وەرن راوەستاندن.”
