مەزلووم عەبدی: ئەم ھێزێن خوە ژ حەلەبێ بۆ باکور و رۆژھلاتێ سووریەیێ ڤەدگوھێزن
فەرماندارێ گشتی یێ ھێزێن سووریەیا دەمۆکراتیک (ھەسەدێ) راگھاند کو، پێخەمەتی پاراستنا جانێ وەلاتیان و ب ناڤبەینکاریا ناڤنەتەوەیی گھیشتنە لھەڤکرنەکێ ژ بۆ ئاگربەستێ و ڤەگوھەستنا شەرڤان، بریندار و سڤیلێن دۆرپێچکری ژ تاخێن شێخ مەقسوود و ئەشرەفیەیێ یێن حەلەبێ بۆ باکور و رۆژھلاتێ سووریەیێ.
فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی ئیرۆ رۆژایەکشەمبت، 11/1/2026ێ، ل سەر تۆرا جڤاکی یا Xێ نڤیسی کو، پشتی گەلەک بزاڤان و ب ناڤبەینکاریا ئالیێن ناڤنەتەوەیی ژ بۆ راوەستاندنا ئێریشێن ل سەر گەلێ حەلەبێ گھیشتنە لھەڤکرنەکێ.
مەزلووم عەبدی ئەشکەرە ژی کر: “ئەڤ لھەڤکرن دێ ببە سەدەما ئاگربەستێ و دێ دەرفەتەکێ پەیدا بکە کو شەھید، بریندار، سڤیلێن دۆرپێچکری و ھەروەسا شەرڤان ژ ھەر دو تاخێن شێخ مەقسوود و ئەشرەفیەیێ یێن حەلەبێ بۆ باکور و رۆژھلاتێ سووریەیێ بێن ڤەگوھەستن.”
ناڤبری د پەیاما خوە دە بانگ ل ئالیێن ناڤبەینکار ژی کریە کو، پابەندی سۆزێن خوەیێن راوەستاندنا بنپێکرنان بن و رێیێ ل بەر ڤەگەرا ئاشتیانەیا ئاوارەیان ژ بۆ سەر مال و حالێن وان ڤەکن.
فەرماندارێ گشتی یێ ھەسەدێ ل داویێ ژی پەسنا بەرخوەدانا شەرڤانان و شێنیێن شێخ مەقسوود و ئەشرەفیەیێ کریە و سەرساخی ژ مالباتێن شەھیدان رە خوەستیە.
ئەڤ ژی د دەمەکێ دەیە کو د پێنج رۆژێن بۆری دە، ئارتێشا عەرەبی یا سووریەیێ ب چەکێن گران و ب ھەزاران لەشکەران ئێریش ل دژی ھەر دو تاخێن شێخ مەقسوود و ئەشرەفیەیێ دان دەستپێکرن، ل ئالیێ دن ژی ھێزێن ئەولەکاریا ھوندرین یێن حەلەبێ ژی ب چەند لەشکەران بەرەڤانی ژ وان تاخان دکر.
