رێڤەبەریا خوەسەر: ئەندامێن داعشێ ژی بەشداری ئێرشا لسەر تاخێن شێخ مەقسوود و ئەشرەفیێ بوونە

رێڤەبەریا خوەسەر یا باکور و رۆژھلاتێ سوریەیێ ئیرۆ رۆژا یەکشەمبی، 11/1/2026ێ، دیار کر کو ل سەر تاخێن شێخمەقسود و ئەشرەفیێ ئێرشێن هۆڤانە پێک ھاتنە، تاوانێن شەری ھاتنە کرن و دەستنیشان کر کو کۆمکوژی و سڤکاتیێن ژ ئالیێ ئێریشکارن ڤە ھاتنە کرن، بێ سزا نامینن.

داخویانیا ل سەر مالپەرا رێڤەبەریێ ھاتیە پارڤەکرن وھایە:

“د 6ێ چلەیا 2026ێ دە، تاخێن شێخمەقسوود و ئەشرەفیێ یێن حەلەبێ راستی ئێرشەکا لەشکەری یا بەرفرەھ ھاتن کو ژ ئالیێ کۆمێن گرێدایی وەزارەتا پاراستنێ یا حکوومەتا دەمکی یا سووریەیێ ڤە، وەکی بەشەک ژ پلانەکا ترکیەیێ و ب پشتگریا بێدەنگا ھێزێن ناڤنەتەوەیی و ھەرێمی، ھاتە دەستپێکرن.

ئەڤ ئێرش بەشەکا نوو یا ئارمانجکرنا ھەبوونا کوردان کو پێکھاتەیەکا یەکگرتی یا نفووسا حەلەبێ نە و بەردەوامیا بنپێکرن و کۆمکوژیێن گران یێن ل دژی نشتەجھێن پەراڤێن سووریەیێ و خەلکێ پارێزگەھا سووەیدایێ یە.

ئەڤ ئێرشێن کو 6 رۆژان بەردەوام بوون، د بنگەھ دە ئێرشەکا ناڤنەتەوەیی یا ل سەر دو تاخان بوو. ب ھەزاران ئەندامێن کۆمێن چەکدار ب چەکێن گران یێن جووربەجوور ئێرش پێک ئانین. ئەندامێن داعشێ ژی بەشداری ئێرشێ بوون. ل ھەمبەری ڤان ئێرش و ھەژمارا زێدە، تەنێ ب سەدان ئەندامێن ھێزێن ئەولەکاریا ھوندرین ھەبوون. ئەو شەرەکی نەوەکھەڤ بوو، دووری نرخێن مرۆڤی، ئەخلاقی و قاعیدەیێن شەرێن ناڤنەتەوەیی ھات مەشاندن.

ل گەل ڤێ یەکێ، ھەڤالێن مەیێن د ھێزێن ئەولەکاریا ھوندرین دە ب بەرخوەدانەکا دیرۆکی و قەھرەمانی ل دژی ڤێ ئێرشێ سەکنین، پاراستنا گەلێ مە ل ھەر دو تاخان کرن. د 6 رۆژێن بەرخوەدانەکا بێناڤبەر و ب جەسارەتا ل دژی جورە چەکێن گران دە، قەھرەمانێن مە فەداکاریا ھەری بلند نیشان دان. ژ فەرماندارێن قەھرەمان زیاد و ئازاد کو ئێرشێن ھەری دژوار شکاندن و ب بریارداریەکا بێناڤبەر بەرخوەدان برێڤە برن، بگرە ھەیا ھەڤالێن مە ھاوار، دلبرین، ڤیان، فەراشین، رۆژبین و دەنیز، ب فەداکاریا خوە د ئاستا ھەری بلند دە گرێدانا ب نرخ و دۆزا گەلێ خوە رە نیشان دان. فەداکاریێن وان دێ ھەر و ھەر د دل و ھشێ نەتەوەیا مە دە بمینن.

گرتنا ھەر دو تاخان ژ ئالیێ کۆمێن چەکدارێن گرێدایی وەزارەتا پاراستنێ ڤە وەکی سەرکەفتنەکێ نایێ بناڤکرن. بەرەڤاژی ڤێ، ئەو کریارەک خیانەت و سووجەک گرانە کو ژ ھێلا دەستھلاتداریەکێ ڤە تێ کرن کو ئیدیعا دکە دەولەتێ تەمسیل دکە. لێ د ھەمان دەمێ دە وەلاتیێن خوە دکوژە و روومەتا وان بنپێ دکە. دەستھلاتەک کو ئیدیعا دکە کو ئیسلامێ دپارێزە، ل  ھەمبەری جەنازەیان بێرێزیێ دکە، تاوانێن شەری یێن ئەشکەرە دکە. ھەر دەستھلاتداریەکە کو ل دژی گەلێ خوە، خوە دسپێرە دەولەتەک دن، رەواتیا خوە وندا دکە. ژ بەر کو تەنێ گەل چاڤکانیا رەواتیێیە. بکارئانینا تانک و تۆپێن گران ل دژی تاخێن نشتەجھبوونێ قەلسی و ترسا ڤێ دەستھلاتداریێ نیشان ددە. ئەڤ دێ وەکی لەکەیەکێ ل سەر دیرۆکا سووریەیێ بمینە.

ئەم دیار دکن کو ئیرادەیا گەلێ مە یا ب دەھان سالان ل ھەمبەر دۆرپێچکرن و نەحەقیێ ل بەر خوە دایە، ھەم د بن دەستھلاتداریا بەعسێ دە و ھەم ژی د دەما حکوومەتا دەمکی دە، ل گەل بەرخوەدانیا کو ژ ھێلا لەھەنگێن مە ڤە ھاتیە نیشاندان، سەرکەفتنا راستینە.

ھەر وھا ئەم ئەشکەرە دکن کو کۆمکوژی، بنپێکرن و ھەقارەتێن ل دژی گەلێ مە و شەھیدێن مە ھاتنە کرن بێ سزا نامینن. ھەتا کو ژ بەرپرسیاران حەساپ تێ خوەستن دێ برینێن وان د وژدانا مە دە زندی بمینن.

ب بەرچاڤگرتنا پراکتیک و بنپێکرنێن جدی یێن کو د رۆژێن داوی دە قەومینە، ئەم بانگ ل رێخستنێن ناڤنەتەوەیی و یێن مافێن مرۆڤان دکن کو رەوشا مرۆڤی و ئەولەھیێ یا ل تاخێن شێخمەقسوود و ئەشرەفیێ بشۆپینن. گەلێ مە راستی ئێرشێن ھۆڤانە، بنپێکرنێن روومەتا مرۆڤان، ئینفاز، تاوانێن شەر، پاقژکرنا ئەتنیکی و گوھەرتنا دەمۆگرافیک تێ. ھەر وھا ئەم داخوازا ھەبوونا ھێزەک ناڤنەتەوەیی ل ھەر دو تاخان دکن دا کو پێشی ل تاوانێن دن بگرن. ژ بەر کو ھێزێن ئەولەھیێ یێن دەولەتێ ژ ھێلا کەسێن خوەدی ئایدۆلۆژیێن توندرەوێن وەکی داعشێ ڤە تێنە رێڤەبرن، لەوما باوەری ب وان نایێ.

ئارمانجا سەرەکی یا ڤێ ئێرشێ گوھەرتنا دەمۆگرافیکە، ئەم ژ نشتەجھێن خوەیێن ل ھەر دو تاخان دخوازن کو ل مالێن خوە بمینن. ئەم بانگ ل کەسێن کو ژ جھ و وارێن خوە بوونە دکن کو ڤەگەرن. ئەم ب تەڤاھی ژ مەزناھیا ئێشا کو گەلێ مە کشاندیە ھایدارن. ئەم وەکە رێڤەبەریا خوەسەرا باکور و رۆژھلاتێ سووریەیێ دیار دکن کو ئەم دێ ھەموو چاڤکانیێن خوەیێن مادی و ئەخلاقی ژ بۆ سڤککرنا باندۆرێن ڤی شەری پێشکێش بکن. ئەم دێ ل ھەر دەرێ و د ھەر شەرت و مەرجی دە ل کێلەکا گەلێ خوە بسەکنن.”