هەسەدە: وەزارەتا بەرەڤانیێ یا شامێ ئاگاھیێن درەو بەلاڤ دکە
ناڤەندا راگھاندنا ھەسەدێ ئیدیعایێن دەربارێ لڤ و تەڤگەرا لەشکەری یا ھێزێن وان یێن ل ئەنیا دێر حافرێ درەواند. ھەروھا ئەشکەرە کر، ل ھەرێمێ ئێرشێن درۆنێن خوەکوژ و تۆپبارانا فراکسیۆنێن گرێدایی حکوومەتا شامێ و فرۆکەیێن دەولەتا ترک بەردەوام دکن.
ناڤەندا راگھاندنا ھێزێن سووریا دەمۆکراتیک (ھەسەدێ)، ب داخویانیەکێ بەرسڤا ئیدیعایێن “وەزارەتا بەرەڤانیێ”یا حکوومەتا شامێ دا. ھەسەدێ دیار کر، نووچەیێن دەربارێ سەوقیەتا لەشکەری یا ل ئەنیا دێر دووری راستیێ نە.
د داخویانیا ھەسەدێ دە ھات دەستنیشانکرن، ل ھەرێمێ چ ئامادەکاری یان تەڤگەرێن لەشکەری یێن دەرڤەیی ئاسایی نینن. ھات ئەشکەرە کرن کو سەدەما کۆمبوونا خەلکێ ل وێ ھەرێمێ نە لەشکەرییە، لێ بەلێ گەلێ باکور و رۆژھلاتێ سووریەیێ ژ بۆ پێشوازیکرنا بریندارێن کو ژ تاخێن شێخمەقسوود و ئەشرەفیێ یێن حەلەبێ دھاتن، ل ور کۆم ببوون.
ئێریشێن ب درۆنێن خوەکوژ و تۆپباران
ھەسەدێ بال کشاند سەر رەوشا ئەولەھیێ یا ل ھەرێمێ و دیار کر کو بەرەڤاژی ئیدیعایێن حکوومەتێ، ل ھەرێمێ ئێرشەکا دژوار ھەیە. ل گۆری داخویانیێ:
– ل سەر ئاسیمانێ بەنداڤا تشرینێ و دەردۆرا وێ، تەڤگەرا درۆنێن خوەکوژ یێن کۆمێن گرێدایی حکوومەتا شامێ ھەیە و ھەرێم ب گرانی تێ تۆپباران کرن.
– ل ھەرێما دێر حافر، گوندەوارێن وێ و ھەرێما زەڤیا ئەل-سەورا، ب درۆنێن خوەکوژ و تۆپبارانێ ئێرش پێک ھاتنە.
– درۆنێن دەولەتا ترکیەیێ یێن جورەیێ “بایراکتار” و “ئاکنج” ل سەر ئاسیمانێ ھەرێمێ د ناڤا تەڤگەرێ دە نە.
بەلگەیێن ئێرشان ھاتن پارڤەکرن
ناڤەندا راگھاندنا ھەسەدێ ھەروھا وێنەیێن پارچەیێن تۆپێن “بایراکتار”یێن کو سازیەک ل ھەرێما مەسکەنێ ئارمانج گرتبوو، وەک بەلگە پێشکێشی رایا گشتی کر.
د داویا داخویانیێ دە ھات دەستنیشانکرن کو ھێزێن ھەسەدێ رەوشێ ژ نێزیک ڤە دشۆپینن و ل دژی ھەر جورە ئێرشان د ئامادەباشیێ دە نە.
