کۆنفەدەراسیۆنا دیاسپۆرایا کوردستانی و دەزگەها بارزانی یا خێرخوازیێ بانگەکا نەتەوەیی راگهاند
کۆنفەدەراسیۆنا دیاسپۆرایا کوردستانی، ب مەرەما رووبرووبوونا وێ رەوشا مرۆڤی یا دژوارا کو نها ل عهفرینێ چێ بوویە، بانگەکا لەزگین ئاراستەیی هەمی خێرخوازان و دیاسپۆرایا کوردستانی ل سەرانسەری جیهانێ دکە، دا کو ب رێیا دەزگەها بارزانی یا خێرخوازیێ ئالیکاریێن خوە یێن مرۆڤی بگهینن لێقەومیان و ئاوارەیێن وێ دەڤەرێ.
ئەڤ بانگا کۆنفەدەراسیۆنا دیاسپۆرایا کوردستانی د دەمەکێ دەیە کو، خەلکێ عهفرینێ ژ بەر سەرمایا دژوار و هاتنا هەژمارەکا مەزنا مالباتێن ئاوارە د رەوشەکا مرۆڤی یا پر دژوار دە دژین، ب رەنگەکی کو هەوجەداری ژ شیانا بەرسڤدانا هەیی دەرباز بوویە.
د ڤێ چارچۆڤەیێ دە، دەزگەها بارزانی یا خێرخوازیێ ل عهفرین و حەلەبێ رۆلەکا پێشەنگ و سەرەکە د پێشکێشکرنا ئالیکاریان دە دلیزە و ل دەڤەرێ وەکی پشتگرەکا راستینا مالباتێن زراردیتی یە.
کۆنفەدەراسیۆنا ناڤبری تەکەزێ ل سەر وێ یەکێ ژی دکە کو، ئارێشەیا نها یا عهفرینێ بەری کو ئالیێن لەشکەری ئان سیاسی هەبن، پرسەکا مرۆڤی یە و ژ بۆ بسەرخستنا بزاڤێن ئالیکارێن نها پێدڤیتی ب بەرپرسیاریتیەکا گشتی هەیە.
ژ بۆ ڤێ مەرەمێ ژی، کۆنفەدەراسیۆنا دیاسپۆرایا کوردستانی بانگ ل هەمیان دکە کو ب رێیا فەرمی پشتگریێ بدن دەزگەها بارزانی یا خێرخوازیێ. بانگ ل مەدیایێ ژی دکە کو، هەژمارێن حەسابێن خوە یێن بانکان بەلاڤ بکن دا کو هەری زێدە کەس بکارن تەڤلی ڤی ئەرکێ نەتەوەیی ببن.
ئەو کۆنفەدەراسیۆن تەکەز ژی دکە کو، گهاندنا ڤێ بانگێ ژ بۆ هەمی ئالیان ل هەمبەر ئێشێن گەلێ مە هەلوەستەکا زەلالە و ژ بۆ بەردەوامیا کارێن مرۆڤی بنگەهەکا سەرەکەیە، ژ بەر کو نها دەما کریارانە و پاراستنا ژیانا وەلاتیان بەرپرسیاریەکا هەڤپارا هەمیانە.
ئەڤ بزاڤ د دەمەکێ دەیە کو، دیاسپۆرایا کوردستانی هەر جار وەکی هێزەکا زندی د دەمێن نەخوەستی دە پشتگری دایە لێقەومیێن پارچەیێن کوردستانێ و ئەڤ کامپانیایا نوو ژی تەمامکەرا ڤی کاروانێ مرۆڤییە.
