ئیلھام ئەحمەد: دڤێت زەختەکا ناڤنەتەوەیی بۆ راوەستاندنا ئێریشان ھەبە

بەرپرسا پەیوەندیێن دەرڤە یا رێڤەبەریا خوەسەر یا باکور و رۆژھلاتێ سووریەیێ ئاماژە دا کو، چ کەسەک ب تەنا سەرێ خوە خوەدیێ سووریەیێ نینە، بەلکی دڤێت ھەمی نەتەوە و پێکھاتە د ئاشتیێ دە بژین.

بەرپرسا پەیوەندیێن دەرڤە یا رێڤەبەریا خوەسەر ئیلھام ئەحمەد ئیرۆ رۆژا سێشەم، 13/1/2026ێ، د کۆنفەرانسەکا رۆژنامەڤانی دە راگھاند: دڤێت گارانتیا ژیانێ ھەبە، دڤێت چارەسەریەکا سیاسی ژ بۆ رەوشا سووریەیێ و ھەلوەستەکا جدی ژ ئالیێ رایەدارێن سووریەیێ ڤە ژ بۆ چارەسەرکرنا پرسگرێکان ھەبە.

ئیلھام ئەحمەد ھەروەسا گۆت: دڤێت ئیرادە ھەبە کو ھەمی پێکھاتە و نەتەوەیێن جودا جودایێن سووریەیێ ب ھەڤ رە بژین، ژ بەر کو ئەو تەنێ ل سووریەیێ ناژین، بەلکی سووریە ژ ھەژمارەکا نەتەوە و پێکھاتەیێن جودا جودا پێک تێ.

بەرپرسا ناڤبری ئاماژە ژی دا: گۆتن تەنێ بەس نینە، کو تێ گۆتن کورد خوەشتڤیێن مە نە، بەلکی دڤێت د کریارێن وان دە بێ نیشاندان، ھەروەسا دڤێت زەختەکا ناڤنەتەوەیی ژ بۆ راوەستاندنا ئێریشان ژ ئایێ ئارتێشا عەرەبی یا سووریەیێ ڤە ھەبە. مە ھەرگاڤ ئامادەبوونا خوە ژ بۆ دیالۆگێ نیشان دایە، لێ ئەم تەکەزێ ل سەر راوەستاندنا ئێریشان دکن.

بەرپرسا پەیوەندیێن دەرڤە یا رێڤەبەریا خوەسەر ئاماژە ژی دا: تشتێن کو حکوومەتا شامێ د مەدیایێ دە دبێژە تەنێ تێکدانە، ژ بەر کو د راستیێ دە چ سۆز و کریارێن خوە ب جھ نایینە. جڤاکا ناڤنەتەوەیی و وەلاتێن رۆژئاڤایی ل بەرانبەری ئێریشێن ئارتێشا عەرەبی یا سووریەیێ بێدەنگ و بێھەلوەستن، ئەڤ ژی کارەکێ خەلەتە.

ئیلھام ئەحمەد ھەروەسا گۆت: ئەم بانگ ل سەرۆکێ ئامەریکایێ دۆنالد ترومپ دکن کو پێشەنگیێ بکە و ئاشتیێ ل دەڤەرێ بەرقەرار بکە، لێ پشتی کوشتنا ب سەدان وەلاتیێن کورد و د دوڤ رە بانگا ئاشتیێ بێ کرن، ھنگێ تشتەک ب ناڤێ ئاشتیێ نامینە، پرسا کوردان ب ڤی رەنگی نایێ چارەسەرکرن.

ئارتێشا عەرەبی یا سووریەیێ ل رۆژا سێشەمێ 6/1/2026ێ، ب پشتگریا کۆمێن چەکدار یێن ئەبوو عەمشە و ھەمزاتێ، پشتی ئالۆزیێن 8ێ ڤێ مەھێ، ژ رۆژا 10ێ ڤێ مەھێ ڤە ب زێدەتری 40 ھەزار چەکدار و چەکێن گران ئێریشی ھەر دو تاخێن کوردان یێن حەلەبێ کر. پشتی پێنج رۆژان ژ شەر و پەڤچوونان د ناڤبەرا ھێزێن ئاساییشا ھەسەدێ و ئارتێشا عەرەبی یا سووریەیێ دە، ئەو ھەر دو تاخ کەفتن بن دەستێ ھێزێن سووریەیێ.