ھەسەدە: شام بەنداڤا تشرینێ بۆمبەباران دکە
ھێزێن سووریەیا دەمۆکراتیک (ھەسەدێ) راگھاند کو، ھێزێن ئارتێشا عەرەبی یا سووریەیێ ب درۆن و تۆپان ژ بۆ جارا دویێ بەنداڤا تشرینێ بۆمبەباران دکن.
ھێزێن سووریەیا دەمۆکراتیک (ھەسەدێ) ئیرۆ رۆژا سێشەم، 13/1/2026ێ، د راگھاندنەکا فەرمی دە گۆت: ھێزێن ئارتێشا عەرەبی یا سووریەیێ ژ بۆ جارا دویێ ب بالافرێن بۆمبەکری و تۆپان بەنداڤا تشرینێ بۆمبەباران کر، ھەروەسا ب مووشەکان ئێریش کر سەر گوندێ ئوم ئەل-مرەیێ یێ باشوورێ دێر حافرێ.
ھێزێن سووریەیا دەمۆکراتیک (ھەسەدێ) ئاماژە ژی دا کو، ب بەردەوامکرنا ڤان ئێریشان، ئالۆزی و گرژی دێ دەرباز ببن قۆناغەکا توندتر ل دەڤەرێ.
ھەسەدێ ھەروەسا راگھاند: ھێزێن ئارتێشا عەرەبی یا سووریەیێ ب چەکێن گران ل گوندێن رەسم کرۆم و ئیمامێ ل باکورێ رۆژھلاتێ دێر حافرێ مالێن وەلاتیان بۆمبەباران کرنە، دو جاران ژی ب بالافرێن بۆمبەکری ئێریشی دەڤەرێ کریە.
پشتی ئێریشێن ل سەر ھەر دو تاخێن ئەشرەفیێ و شێخ مەقسوودێ کو تەنێ ژ ھێلا ھێزێن ئەولەکاریا ناڤخوەیی ڤە دھاتن برێڤەبرن، ھێزێن ئارتێشا عەرەبی یا سووریەیێ دەست ب تەڤگەرێن لەشکەری و ئێریشان ل سەر ھێزێن سووریەیا دەمۆکراتیک (ھەسەدێ) ل دەڤەرێن دن یێن رۆژئاڤایێ کوردستانێ کریە، وەکی دێر حافر و بەنداڤا تشرینێ و دەردۆرێن وێ دەڤەرێ.
ھەسەدێ ژی ل گۆری راگھاندنێن خوەیێن فەرمی راگھاندیە کو، ئەو دێ بەرسڤا چاڤکانیێن وان گەف و تەڤگەرێن لەشکەری بدن و رێکارێن پێدڤی ب جھ بینن دا کو دەڤەرێن رۆژئاڤایێ کوردستانێ و وەلاتیێن کورد ل وان دەڤەران بپارێزن.
