ھەسەدە: ل دێر حافرێ فرنا نانی و پۆستەخانە بوون ئارمانجا ئێریشان
ناڤەندا راگھاندنێ یا ھێزێن سووریەیا دەمۆکراتیک (ھەسەدێ) راگھاند، ل باژارێ دێر حافرێ سازیێن خزمەتگوزاریێ و بنەسازیا باژێر ب ئاوایەکی سیستەماتیک تێن بۆمبەباران کرن.
ل گۆری داخویانیا ھەسەدێ، ھێزێن گرێدایی حکوومەتا شامێ و کۆمێن چەکدارێن ل وێ ئەنیێ، ئیرۆ 14ێ چلەیێ ب درۆنا خوەکوژ ئێریشی فرنا نانی یا باژارێ دێر حافرێ کرنە. ھەسەدێ ئەڤ کریار وەکی “تاوانەکا نوو” پێناسە کر و دیار کر کو ئەڤ ئێریش راستەراست ئەولەھیا سڤیلان و دەبارا وان یا رۆژانە دکە ئارمانج.
د داخویانیێ دە ھات دەستنیشانکرن، ئەڤە جارا دویەمینە ژ سەرێ سبێ ڤە کو سازیێن خزمەتگوزاریێ یێن باژارێ دێر حافرێ تێن تۆپبارانکرن، کو ئاڤاھیا پۆستەخانەیێ یا باژێر ژی ئیرۆ ب تۆپ و درۆنان ھاتیە ئارمانجگرتن.
ھەسەدێ بال کشاند سەر مەترسیا ڤان ئێریشان و گۆت: “ئەڤ ئێریشێن ل سەر بنەسازیێ، بنپێکرنەکا ئاشکەرایا ھەموو یاسا و پیڤانێن ناڤدەولەتی نە. ئارمانج ئەوە کو سڤیل ژ خزمەتێن بنگەھین وەرن بێپارکرن و ترس د ناڤ جڤاکێ دە وەرە بەلاڤکرن.”
پشتی ئێریشا ل سەر تاخێن شێخ مەقسوود و ئەشرەفیێ یێن حەلەبێ، ئارتێشا سووریێ و کۆمێن پشتگرێن وان ئەنیێن شەری بەر ب ھەرێمێن دن یێن رۆژئاڤایێ کوردستانێ ڤە فرەھ دکن. نھا ل ھەرێمێن وەکی دێر حافر، مەسکەنە گوندەوارێ تەبقایێ و دەردۆرا بەنداڤا تشرینێ تەڤگەرێن لەشکەری یێن گران تێ دیتن.
