لینزی گراھام: ئەم ئێریشا ل سەر ھەڤپەیمانێن خوەیێن کورد ب چ رەنگان قەبوول ناکن

سیناتۆرەکێ ئامەریکایی تەکەز کر کو، دڤێت حکوومەتا سووریەیێ ل سەر دەستدرێژیا ل سەر مافێن کەمینەیان ل سووریەیێ بهێت ھایدارکرن و ئەڤ نایێ قەبوولکرن.

سیناتۆرێ ئامەریکایی لینزی گراھام، کو دۆستەکێ نێزیکێ سەرۆکێ ئامەریکایێ دۆنالد ترامپە، ئیرۆ رۆژا چارشەم، 14/1/2026ێ ل سەر تۆرا جڤاکی یا Xێ پەیامەک ل سەر رەوشا سووریەیێ بەلاڤ کر.

لینزی گراھام د پەیاما خوە دە نڤیسیە: ئەز داخوازا ئارامکرنا رەوشا سووریەیێ دکم. ھندەک راپۆرتێن باوەرێ ھاتنە بەلاڤکرن کو بەحسا وێ یەکێ دکن کو، ھێزێن سووریەیێ زێدەتر پێنگاڤان ل دژی ھەڤپەیمانێن مەیێن کورد دهاڤێژن. ھەر پێنگاڤەکا ب ڤی رەنگی، ب دیتنا من دبە سەدەما وێ یەکێ کو ئامەریکایێ رەنگڤەدانەکا توند ھەبە.

گراھام د پەیاما خوە دە ھەروەسا گۆت: ئەم پشتگریێ ددن وێ یەکێ کو دەرفەتەکا دن ب سووریەیێ بهێت دان، لێ ئەم ئێریشا ل سەر ھەڤپەیمانێن خوە یێن کورد قەبوول ناکن، کو د شکاندنا داعشێ دە ھێزا سەرەکی بوون.

ئارتێشا عەرەبی یا سووریەیێ ل رۆژا سێشەمێ 6/1/2026ێ ب پشتگریا کۆمێن چەکدار یێن ئەبوو عەمشە و ھەمزاتێ، پشتی ئالۆزیێن 8ێ ڤێ مەھێ، ژ رۆژا 10ێ ڤێ مەھێ ڤە ب زێدەتر ژ 40 ھەزار چەکداران و چەکێن گران ئێریشی ھەر دو تاخێن کوردان یێن حەلەبێ کر. پشتی پێنج رۆژان ژ شەر و پەڤچوونان د ناڤبەرا ھێزێن ئاساییشا ھەسەدێ و ئارتێشا عەرەبی یا سووریەیێ دە، ئەو ھەر دو تاخ کەفتن بن دەستێ ھێزێن سووریەیێ.