رێڤەبەریا خوەسەر دەرگەهێن ب ناڤچه‌یێن حكوومه‌تا شامێ ده‌ گرتن

رێڤەبەریا خوەسەر ژ بەر سەدەمێن ئەولەهیێ، بریارا گرتنا هەموو دەرگەهێن ل هەرێمێن تەبقا، رەقا و دێرەزۆرێ دا.

فەرمانداریا گشتی یا ئەولەکاریا دەرگەهان یا سەر ب دەستەیا هوندرین یا رێڤەبەریا خوەسەر ڤە، ئیرۆ 15ێ چلەیێ د داخویانیەکە نڤیسکی دە دیار کر، ئەڤ بریار پشتی پێشهاتیێن ئەولەهیێ یێن مەترسیدار و بریارا حکوومەتا ڤەگوهێز یا ل شامێ یا ژ بۆ گرتنا دەرگەهان، هاتیە دایین.

د داخویانیێ دە هات دەستنیشانکرن کو گرتنا دەرگەهان ژ ئالیێ شامێ ڤە بوویە سەدەما تەنگەزاری و ئالۆزیەکە ئەولەهیێ یا مەزن. ئەڤ رەوش راستەراست مەترسیێ ل سەر ژیانا سڤیلان، کارکەر و رێویێن کو ڤان دەرگەهان ب کار تینن، چێدکە. ژ بەر ڤێ یەکێ، ژ بۆ پاراستنا ئەولەهیا گشتی رێڤەبەریا خوەسەر ئەڤ بریار گرتنە:

1- گرتنا دەرگەهان: هەموو دەرگەهێن د سینۆرێ تەبقا، رەقا و دێرەزۆرێ دە هەتا ئاگاهدارکرنەکە دن هاتنە گرتن.

2- دەما بریارێ: بریار ژ دیرۆکا وەشاندنا داخویانیێ (15ێ چلەیا 2026ان) ڤە دکەڤە وارێ جبجیکرنێ.

فەرمانداریا ئەولەکاریا دەرگەهان دیار کر کو ئەڤ بریار دو رەوشان ل دەرڤەیی گرتنێ دهێلە:

1- رەوشێن مرۆڤی: کەسێن کو رەوشا وان یا تەندورستی ئان ژی مرۆڤی یا ئاوارتە هەبە، دێ کاربن دەرباس ببن.

2- رێخستنێن مرۆڤی: رێخستنێن مرۆڤی یێن فەرمی و پەژراندی دێ ژ ڤێ بریارێ بێپار بن و خەباتێن وان دێ بەردەوام بکن.

ئەڤ بریار پشتی وێ یەکێ تێ، دەستەیا ئۆپەراسیۆنان یا ئارتێشا سووریەیێ د 13ێ چلەیێ دە هەرێمێن دێر حافر، بابیری، قەواس و مەسکەنەیێ وەک “هەرێما لەشکەری یا قەدەغە” راگهاندبوو و دەست ب ئێریشێن ل سەر ڤان هەرێمان کربوو.