رێڤەبەریا خوەسەر بۆ ئەحمەد شەرع: ماف ب فەرمانێن دەمکی نایێن پاراستن

رێڤەبەریا خوەسەر یا باکور و رۆژھلاتێ سووریێ ئانگۆ رۆژئاڤایێ کوردستانێ، د داخویانیەکێ دە دەربارێ فەرمانا کو دوھ ئێڤارێ ژ ھێلا ئەحمەد شەرع ڤە ھاتیە دایین دە، تەکەز کر کو ماف ب فەرمانێن دەمکی نایێن پاراستن و پێدڤی ب رێزکنامەیێن دایمی یێن کو ھەموو گەل و باوەریان دحەوینە ھەیە.

رێڤەبەریا خوەسەر یا باکور و رۆژھلاتێ سووریێ دەربارێ فەرمانا کو دوھ ئێڤارێ ژ ھێلا ئەحمەد شەرع، سەرۆکێ حکوومەتا دەمکی یا سووریێ ڤە ھاتیە دایین دە داخویانیەک نڤیسکی وەشاند.

رێڤەبەریا خوەسەر یا رۆژئاڤایێ کوردستانێ راگەھاند: “مە بریارا سەرۆکێ حکوومەتا دەمکی یا سووریێ ئەحمەد شەرع یا دەر بارێ مافێن کوردێن ل سووریێ دە شۆپاند. ئەم دیار دکن کو ماف ب بریارێن دەمکی نایێن پاراستن، لێ ب دەستوورێن دایمی یێن کو ئیرادەیا گەلان و تەڤاھی پێکھاتەیان ئیفادە دکن، تێنە پاراستن.

ھەروەھا راگەھاند: ھەر بریارەک نیەتا وێ چ دبە بلا ببە، ئەگەر نەبە بەشەک ژ دەستوورەکێ گشتی و مافێن ھەر کەسی بێیی جودابوون مسۆگەر نەکە، نابە گارانتیا راستەقینە یا مافێن تەڤاھیا پێکھاتەیان. وەکی کو د ھەڤپەیمانا جڤاکی یا رێڤەبەریا خوەسەریا دەمۆکراتیک دە ھاتیە دەستنیشانکرن، دڤێت دەستوورەکێ دەمۆکراتیک یێ پڕەنگ وەرە ئاڤاکرن کو مافێن تەڤاھی پێکھاتە و جڤاک و باوەریێن ل سووریێ بپارێزە. ژ بەر کو پڕەنگی ژێدەرا ھێزا سووریێ و جوانییا وێیە.

داخویانیێ دە ھات گۆتن: د دەمەکێ دە ئەم دبینین دبە ئەڤ بریارە گاڤا دەستپێکێ بە، لێ ھێڤیێن گەلێ سووریێ ب جھ ناینە کو بەردێلێن گران دانە و شۆرەشەکا راستەقین ژ بۆ بدەستخستنا مافێن خوە یێن رەوا، ئاڤاکرنا دەولەتەکا دەمۆکراتیک کو ھەر کەس تێ دە ب ئازاد و روومەت، عەدالەت و وەکھەڤ بژی.

رێڤەبەریا خوەسەر داویێ دە ژی گۆت: ئەم تەکەز دکن کو دیالۆگا نیشتمانی یا راستەقین، دەستوورەکێ دەمۆکراتیک یێ نەناڤەندی یێ کو تەڤکاریا راستەقین د ناڤبەرا ھەموو سووریەییان دە میسۆگەر بکە و بنگەھێن دەولەتا ھەموەلاتیبوونێ و عەدالەتا جڤاکی دەینە، چارەسەریا بنگەھین یا پرسگرێکێن ماف و ئازادیێن ل سووریێیە.”