ھەسەدە: شامێ ب تانکان ئێریشی مە کر و ھەژمارەکا شەرڤانان کوشت

ھێزێن سووریەیا دەمۆکراتیک (ھەسەدێ) راگھاند کو، بەرەڤاژی پەیمانا ناڤنەتەوەیی، ھێزێن حکوومەتا شامێ ب چەکێن گران و تانکان ئێریشی خالێن وان ل رۆژئاڤایێ رەقەیێ کریە و چەند شەرڤان ھاتنە کوشتن.

ناڤەندا راگھاندنێ یا ھەسەدێ ئیرۆ رۆژا شەمبی، 17/1/2026ێ، د داخویانیەکێ دە ئەشکەرە کر کو، ل دەڤەرا دەبسی ئەفنانێ شەر چێ بوویە. ھەسەدێ ھەروەسا گۆت: ئەڤ ئێریشەکا زۆردارانە بوو ژ بەر کو ل گۆری پەیمانێ ئاگربەست ھەبوو و دەستوورا 48 دەمژمێران ژ بۆ ڤەکشینا ھێزێن مە ژ دێر حافر و مەسکەنەیێ ھەبوو.

ل گۆری وێ داخویانیێ، بەری کو دەما وێ ڤەکشینێ بقەدە، حکوومەتا شامێ کاروانێن لەشکەری و تانک برنە وێ دەڤەرێ و ئێریش کریە سەر ھێزێن وان.

ھەسەدێ ئالیێن ناڤنەتەوەیی یێن کو چاڤدێریا وێ پەیمانێ کریە وەکی بەرپرسیارێن رژاندنا وێ خوینێ دبینە، ھەروەسا بانگا دەستتێوەردانا بلەز ژ بۆ راوەستاندنا ئێریشێن شامێ دکە، بەری کو رەوش ژ کۆنترۆلێ دەرکەڤە.

فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی دوھی رۆژا ئینی، 16/1/2026ێ ل سەر حەسابا خوە یا تۆرا جڤاکی یا Xێ نڤیسیبوو: مە بریارەکا یەکالیکەر ل سەر رەوشا مەیدانی یا رۆژھلاتێ حەلەبێ دا و ئەم دێ ھێزێن خوە بەر ب رۆژھلاتێ فراتێ ڤە ڤەکشینن.

فەرماندارێ گشتی یێ ھەسەدێ ھەروەسا گۆتبوو: ل سەر داخوازا وەلاتێن دۆست و ناڤبەینکار، ھەروەسا ژ بۆ نیشاندانا نیەتا باشا ل ھەمبەر بجیھانینا بەندێن پەیمانا 10ێ ئادارێ، مە بریار دا کو ئەم ھێزێن خوە ڤەکشینن.

د ڤێ ناڤبەرێ دە، پێڤاژۆیا ڤەکشینێ یا ھێزێن وان ئیرۆ رۆژا شەمبی، 17/1/2026ێ دمژمێر 7:00ێ سەرێ سبەھێ ھات دەستپێکرن.