سەرۆک بارزانی مێڤانداریا تۆم باڕاک، مەزلووم عەبدی و محەمەد ئیسماعیل دکە
سەرۆک مەسعوود بارزانی مێڤانداریا جڤینەکا گرنگ یا د ناڤبەرا نوونەرێ تایبەتێ ئامەریکایێ تۆم باڕاک، فەرماندارێ گشتی یێ ھەسەدێ مەزلووم عەبدی و سەرۆکێ ئەنەکەسێ محەمەد ئیسماعیل دە کر.
بارەگەھا بارزانی راگھاند، سەرۆک مەسعوود بارزانی ئیرۆ 17ێ چلەیا 2026ێ، پێشوازی ل شاندەیەکا پایەبلند یا ئامەریکی و فەرماندار و بەرپرسێن کوردێن رۆژئاڤایێ کر. د ڤێ جڤینا ستراتەژیک دە ئەڤ کەس ئامادە بوون:
– بالیۆز تۆم باڕاک، نوونەرێ تایبەتێ سەرۆکێ ئامەریکایێ ژ بۆ کارووبارێن سووریەیێ.
– مەزلووم عەبدی، فەرماندارێ گشتی یێ ھێزێن سووریەیا دەمۆکراتیک (ھەسەدە).
– محەمەد ئیسماعیل، سەرۆکێ ئەنجوومەنا نشتمانی یا کوردی ل سووریەیێ (ئەنەکەسە).
– وێندی گرین، کۆنسولا گشتی یا ئامەریکایێ ل ھەولێرێ.
– جەنەرال کیڤن لامبێرت، فەرماندارێ ھێزێن ئامەریکایێ ل سووریەیێ.
– کۆلۆنەل زاکارا جۆرک.
سەرۆک مەسعوود بارزانی د دەستپێکا ھەڤدیتنێ دە ب گەرمی بخێرھاتنا ئالیان کر و سپاسیا وان کر کو د ڤێ سەردەم و رەوشا تایبەت دە ژ بۆ پێکانینا ئاشتیێ و رێگرتنا ل توندووتووژیێ ل ھەڤ جڤینە. سەرۆک بارزانی د ئاخافتنا خوە دە تەکەزی ل سەر گرنگیا دیالۆگێ کر و بال کشاند سەر بنگەھا “ژیانا ھەڤبەش و ئارامیێ” د ناڤا سووریەیەکا نوو دە.
نوونەرێ ئامەریکایێ تۆم باڕاک ل سەر ناڤێ وەلاتێ خوە سپاسیا سەرۆک بارزانی کر ژ بۆ مێڤانداریا ڤێ جڤینا گرنگ و ھەر وھا ژ بۆ پشتگریا جەنابێ وی یا بەردەواما ژ بۆ چارەسەرکرنا کریزا سووریەیەیێ.
د جڤینێ دە بەشداران ب ھوورگلی ل سەر گەشەدانێن داوی یێن ل سووریەیێ ئاخڤین و نێرینێن خوە پارڤە کرن. ل گۆری ئاگاھیان، ئالیان ژ بۆ مسۆگەرکرنا ئارامیێ ل ھەرێمێ، ل سەر چەند گاڤێن کرداری (پراکتیک) ل ھەڤ کرن، دا کو رێ ل بەر ئالۆزیێن لەشکەری یێن نوو وەرە گرتن.
ئەڤ ھەڤدیتن د دەمەکێ دە پێک تێ کو ئامەریکا و ھەرێما کوردستانێ ھەول ددن ئالیێن کوردی یێن سووریەیێ و حکوومەتا نوویا ل شامێ بینن سەر ماسەیا دیالۆگێ.
