ئۆجالان ل سەر حەلەبێ بێدەنگە، لێ ئیرۆ پەیامەک ژ بۆ کۆنفەرانسا ئینسیاتیفا یەکیتیا دەمۆکراتیک شاند
عەبدوللاهـ ئۆجالان، رێبەرێ پەکەکەیا هلوەشیایی، ئیرۆ پەیامەک ژ بۆ دویەمین جڤینا گشتی یا ئاسایی یا ئینسیاتیفا یەکیتیا دەمۆکراتیک شاند. ھێژایی گۆتنێیە کو ئۆجالان، ل سەر ئێریشێن بەرفرەھ یێن ل سەر تاخێن کوردان یێن ل ئەشرەفیێ و شێخ مەقسوودێ یێن حەلەبێ و کۆچبەربوونا ب ھەزاران کوردان یا ژ بەر وان ئێریشان، پەیڤەک ژی نەگۆت، لێ بەلێ پەیامەک ژ بۆ کۆنفەرانسێ شاند.
ژ شوباتا 2025ێ ڤر ڤە، رێبەرێ پەکەکێ عەبدوللاهـ ئۆجالان ب بەردەوامی گەلەک جاران پەیام شاندنە. پەیامێن وی لسەر ئێزیدیان، کۆنفەرانسێن ئێزیدیان، جڤینێن پەکەکێ یێن ل کامپا پەنابەران یا مەخموور، جڤینێن پەکەکێ یێن ل قەندیلێ و ھەموو جڤینێن ل ئەورۆپا، سلێمانی و باکورێ کوردستانێ بوون. لێبەلێ، ئۆجالان ل سەر پەڤچوونێن ل حەلەبێ بێدەنگ ما.
ھەمان ئۆجالان ئیرۆ پەیامەک ژ بۆ دویەمین کۆنگرەیا ئینسیاتیفا یەکیتیا دەمۆکراتیک شاند، کو تێ دە دیسا رەخنە ل دەولەتپارێزیێ گرتن و تەکەزی ل سەر یەکیتیا گەلان کر. د پەیاما ئۆجالان دە ھاتیە گۆتن کو “چارەسەریا پرسگرێکا کورد و یەکیتیا دەمۆکراتیک تەنێ دەما کو ل کێلەکا لێگەرینا ئازادی و ئاشتیێ ژ ھێلا ھەمی گەلێن ل ترکیێ، ئیران، ئیراق و سووریەیێ ڤە وەرە نرخاندن، واتەیەکی ب دەست دخە.”
ئەڤ پرس تێ کرن: “چما ئۆجالان، کو ل سەر ھەر مژارێ تشتەکی دبێژە، ل سەر حەلەبێ بێدەنگ ما؟”
بێدەنگیا ئۆجالان ل سەر حەلەبێ د بنگەھ دە تێ ڤێ واتەیێ کو ئەو تشتێ قەومی ئەرێ دکە. ژ دەستپێکێ ڤە، ئۆجالان دخوەست کو ترکیە رۆلەک چالاک ل سووریەیێ بلیزە. وی ھەتا رەخنە ل ھێزێن هەسەدێ گرتن و گۆت کو ئەو بوونە “حەشدا شەعبی یا ئیسرایلێ”. ئۆجالان ھەولەک مەزن ددە دا کو یەکپارچەییا ئاخا سووریەیێ مسۆگەر بکە و هەول ددە چارەسەریا کو ترکیە ل سووریێ دخوازە ب گۆتنێن گونجاو ژ ھێلا گەلێ رۆژئاڤا ڤە وەرە پەژراندن.
“پێڤاژۆیا” کو ژ ھێلا ئۆجالان، باخچەلی و ئەردۆگان ڤە ھاتی دەستپێکرن نە ژ بۆ چارەسەرکرنا پرسگرێکا کورد ل باکورێ کوردستانێ بوو، لێ ژ بۆ بێدەولەتبوونا کوردێن ل رۆژئاڤا بوو. کوردان د ڤێ پێڤاژۆیێ دە ل رۆژئاڤا گەلەک دەم و ئەنەرژی وندا کرن. ونداھی ب ڤێ یەکێ سینۆردار نەبوون؛ وان ئەرد، باژار و ژیان ژی وندا کرن. ب راستی، ئۆجالان و پەکەکە، رێخستنا کو وی ئەو هلوەشاندی، بەرپرسیارێن سەرەکی یێن وێ راستیێ نە کو کوردێن ل رۆژئاڤا ئیرۆ د بن ئێریشەکا مەزن دە نە و دەستکەفتیێن خوە وندا دکن.
ب دوورخستنا رۆژئاڤا ژ ناسنامەیا خوە یا کوردی و کشاندنا وێ بۆ ناڤا سەرپێھاتیەکا ئایدۆلۆژیک، ب ئاخافتنا ل سەر کانتۆنان، باکورێ سووریەیێ و ھتد، ژ دەستپێکێ ڤە شاشتی ھاتن کرن، ئەڤە بوونە سەدەما ونداکرنا ناسنامەیا نەتەوەیی ژ ئالیێ کوردان ڤە.
پێدڤییە کو رێڤەبەریا رۆژئاڤا ڤێ پێڤاژۆیێ ناس بکە، بریارێن خوە بدە و رێ ل بەر سیاسەتا رۆژانە یا پەکەکێ و ئۆجالان بگرە.
