ئۆجالان: تشتێ کو ل سووریەیێ دقەومە بزاڤەکە ژ بۆ تێکدانا پێڤاژۆیا ئاشتیێ
شاندا دەم پارتیێ یا ئیمرالیێ ناڤەرۆکا جڤینا خوەیا لگەل عەبدوللاھ ئۆجالان بەلاڤ کر و راگھاند کو، وان دوھی رۆژا شەمبی، 17/1/2026ێ، سەرەدانا ئیمرالیێ کریە و لگەل عەبدوللاھ ئۆجالان جڤینەک کریە کو نێزیکی دو دەمژمێر و نیڤان دۆم کریە.
د چارچۆڤەیا وێ ھەڤدیتنێ دە، ئۆجالان پابەندبوونا خوە یا ب پێڤاژۆیا ئاشتیێ و جڤاکا دەمۆکراتیک و بەردەوامبوونا ل سەر بانگەوازیا 27ێ شوباتێ تەکەز کر. د ڤێ چارچۆڤەیێ دە ژی، جارەکا دن تەکەز ل سەر گرینگیا ئاڤێتنا پێنگاڤێن پێدڤی ژ بۆ پێشخستنا وێ پێڤاژۆیێ کر.
د وێ راگھاندنێ دە ھاتیە گۆتن کو، مژارا سەرەکی یا وێ جڤینێ گرێدایی پێشھاتێن سووریەیێ بوو. ئۆجالان گۆت کو، ئەو ژ بەر وان پێشھاتان و زێدەبوونا ئالۆزیان پر نیگەرانە و وان وەکی بزاڤەکێ ژ بۆ تێکدانا پێڤاژۆیا ئاشتیێ و جڤاکا دەمۆکراتیک دبینە. ئۆجالان تەکەز ژی کر کو، ھەمی پرسگرێک ل سووریەیێ تەنێ ب دیالۆگ، دانوستاندن و ئاقلمەندیێ دکارن بێن چارەسەرکرن و دڤێت بێن چارەسەرکرن ژی.
ئۆجالان ھەروەسا راگھاند کو، ئەو ئامادەیە کو بەرپرسیاریا خوەیا چارەسەرکرنا ڤێ پرسێ ب دیالۆگێ و دوورکەتنا ژ پەڤچوونێ ب جیھ بینە. بانگا خوە ژی تەکەز کر کو، ھەمی ئالی رۆلا خوەیا ئەرێنی بلیزن و د ڤێ مژارێ دە ب بەرپرسیاری و ب جۆش تەڤبگەرن.
ئەڤ ژی د دەمەکەێ دەیە کو فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی پێر رۆژا ئینی، 16/1/2026ێ، ل سەر حەسابا خوە یا تۆرا جڤاکی یا Xێ نڤیسیبوو: مە بریارەکا یەکالیکەر ل سەر رەوشا مەیدانی یا رۆژھلاتێ حەلەبێ دا و ئەم دێ ھێزێن خوە بەر ب رۆژھلاتێ فراتێ ڤە ڤەکشینن.
فەرماندارێ گشتی یێ ھەسەدێ ھەروەسا گۆتبوو: ل سەر داخوازا وەلاتێن دۆست و ناڤبەینکار، ھەروەسا ژ بۆ نیشاندانا نیەتا باشا ل ھەمبەر بجیھانینا بەندێن پەیمانا 10ێ ئادارێ، مە بریار دا کو ئەم ھێزێن خوە ڤەکشینن.
د ڤێ ناڤبەرێ دە، پێڤاژۆیا ڤەکشینێیا ھێزێن وان دوھی رۆژا شەمبی، 17/1/2026ێ، دەمژمێر 7:00ێ سەرێ سبەھێ ھات دەستپێکرن.
ناڤەندا راگھاندنێیا ھێزێن سووریەیا دەمۆکراتیک (ھەسەدێ) ھەر دوھی د راگھاندنەکێ دە ئەشکەرە کر کو، ل دەڤەرا دەبسی ئەفنانێ شەر چێ بوویە. ھەسەدێ ھەروەسا گۆت: ئەڤ ئێریشەکا زۆردارانە بوو ژ بەر کو ل گۆری پەیمانێ ئاگربەست ھەبوو و دەستوورا 48 دەمژمێران ژ بۆ ڤەکشینا ھێزێن مە ژ دێر حافر و مەسکەنەیێ ھەبوو.
ل گۆری وێ داخویانیێ، بەری کو دەما وێ ڤەکشینێ بقەدە، حکوومەتا شامێ کاروانێن لەشکەری و تانک برنە وێ دەڤەرێ و ئێریش کریە سەر ھێزێن وان.
ھەسەدە ئالیێن ناڤنەتەوەیی یێن کو چاڤدێریا وێ پەیمانێ کریە وەکی بەرپرسیارێن رژاندنا وێ خوینێ دبینە، ھەروەسا بانگا دەستتێوەردانا بلەز ژ بۆ راوەستاندنا ئێریشێن شامێ دکە، بەری کو رەوش ژ کۆنترۆلێ دەرکەڤە.
