رێڤەبەریا خوەسەریا دەمۆکراتیکا ھەرێما باکور و رۆژھلاتێ سووریەیێ رەوشا نەئاسایی و ئامادەباشیێ راگھاند
رێڤەبەریا خوەسەریا دەمۆکراتیکا ھەرێما باکور و رۆژھلاتێ سووریەیێ ئیرۆ رۆژا یەکشەمب، 18/1/2026ێ، ژ بەر گەفان رەوشا نەئاسایی و ھلگرتنا چەکان یا گشتی راگھاند.
رێڤەبەریا خوەسەر د وێ راگھاندنێ دە بانگ ل وەلاتیان کر کو، ب تایبەتی ل دەڤەرێن جزیرێ و کۆبانیێ ژ بۆ رووبرووبوونا ھەر ئێریشەکێ ئامادە بن و تەکەز کر: ئەم ل بەرامبەری شەرەکی ھەبوونێ نە.
رێڤەبەریا خوەسەر تەکەز ژی کر: ژ بۆ پاراستنا دەستکەفتیێن شۆرەشا مە و ناسنامەیا مە، تەنێ یەک ڤەبژارک ھەیە، بەرخوەدانا گەل. ژ بۆ ڤێ ژی ئەم بانگ ل گەلێ خوە دکن کو ل دەردۆرا ھێزێن خوە کۆم ببن و ب ھەڤ رە ل ھەمبەر ڤێ ئێریشا ھۆڤانە بسەکنن و ھەر کەس ب تەڤاھی ئامادە بە.
ئەڤ ژی پەیاما رێڤەبەریا خوەسەرە:
ژ رایا گشتی رە
کۆمێن چەتەیێن گرێدایی حکوومەتا دەمکی یا شامێ ژ دوھ سبەھێ ڤە و ھەتا نھا پەیمان بنپێ کرنە. تەڤی ھەموو خەباتێن ژ بۆ چارەسەریێن ئاشتیانە و داخویانیێن نیەتا باش ژ بۆ ڤەکشینا ژ ھندەک ھەرێمان، لێ شام ھین ژی ب بریارە کو شەر بدۆمینە و ڤەبژارکا لەشکەری ھلدبژێرە.
ژ بەر ڤێ یەکێ ئەم بانگ ل گەلێ خوە دکن کو ئامادە بە، پیڤانا پاراستنا خوە وەکە بنگەھ بگرە، ب ھێزێن خوەیێن لەشکەری رە بسەکنە، باژارێن خوە بپارێزە و تەڤلی شەرێ پاراستنا روومەتێ ببە.
ئارمانجا ڤان ئێریشان کو براتیا ب خوینا کەچ و خۆرتێن مە ھاتیە ئاڤاکرن تێک ببن، فتنە و توندووتووژیێ د ناڤبەرا پێکھاتەیێن باکور و رۆژھلاتێ سووریێ دە دەرخینن، پێکھاتەیێن رەسەن ل سووریێ ھەدەف بگرن و ھەمان ئایدۆلۆژیێ ل سەر ھەموویان فەرز بکن.
ژ بەر ڤێ یەکێ، ئەم ب قۆناغەک گرینگ رە روو ب روو نە، یان ئەم دێ ل بەر خوە بدن و ب روومەت بژین، یان ژی ئەم دێ راستی ھەر جوورە نەھەقی و بنپێکرنێ، وەرن.
ژ بەر ڤێ یەکێ ژی ئەم بانگ ل گەلێ خوە دکن کو بریارا سەفەربەریا گشتی یا کو ژ ئالیێ رێڤەبەریا خوەسەر ڤە ھاتیە راگھاندن، ببەرسڤینن و ب هەسەدێ و یەپەژێ رە، بسەکنن.
ھەر وھا ئەم بانگ ل ھەموو بەشێن گەلێ خوە نەخاسم جوان و کەچان دکن کو ل ھەمبەر چ ئێریشێن کو دبە ل دژی ھەرێما جزیرێ و کۆبانێ چێببن، چەکێ راکن.
دڤێت ئەم فێم بکن کو ئەم ل بەرامبەری شەرەکی ھەبوونێ نە. ژ بۆ پاراستنا دەستکەفتیێن شۆرەشا مە و ناسنامەیا مە، تەنێ یەک ڤەبژارک ھەیە، بەرخوەدانا گەل. ژ بۆ ڤێ ژی ئەم بانگ ل گەلێ خوە دکن کو ل دەردۆرا ھێزێن خوە کۆم ببن و ب ھەڤ رە ل ھەمبەر ڤێ ئێریشا ھۆڤانە بسەکنن و ھەر کەس ب تەڤاھی ئامادە بە.
سلاڤ و رێز
رێڤەبەریا خوەسەر یا دەمۆکراتیکا باکور و رۆژھلاتێ سووریێ
18ێ چلەیێ 2025ێ
