مورات قارایلان: ژ بۆ پاراستنا رۆژئاڤا چ پێویست بە ئەمێ بکن
ئەندامێ کۆمیتەیا برێڤەبر یا پارتیا کارکەرێن کوردستانێ (پهكهكه) یا هلوهشاندی مورات قارایلان، ل هەمبەری ئێرشێن ل سەر رۆژئاڤایێ کوردستانێ پەیامەکە پشتگریێ وەشاند و راگهاند، ئەوێ گەلێ رۆژئاڤا تەنێ نەهێلن و “هەر چ پێویست بە” دێ پێک بینن.
مورات قارایلان ئیرۆ سێشەمێ 20ێ چلەیێ پەیامەکە تایبەت دەربارێ پێشهاتێن داوی یێن ل رۆژئاڤایێ کوردستانێ سووریەیێ و ئێرشێن کۆمێن چەکدارێن ل سەر هەرێمێن کوردی بەلاڤ کر. قارایلان د پەیاما خوە دە تەکەز کر، ئەو ب هەموو شێوەیان پشتگریا گەلێ رۆژئاڤا دکن و ئامادەنە ل دژی ڤان ئێرشان بسەکنن.
قارایلان دەستنیشان کر، ئەڤ ئێرشێن ل سەر رۆژئاڤایێ کوردستانێ نە ئێرشێن هەرێمینە و گۆت: “ئەڤ ئێرش تەنێ ل دژی رۆژئاڤایێ کوردستانێ نینن، ئێرشێن ل سەر تەڤاهیا کوردستانێ نە. د هەمان دەمێ دە ئەڤ هەولدانەکە ژ بۆ تێکبرنا پێڤاژۆیا ئاشتیێ یا کو ل ترکیەیێ تێ ئاخافتن.”
فەرماندارێ پهكهكێ ئەشکەرە کر، ئەڤ ئێرش ژ ئالیێ چەکدارێن “هەیئەت تەحریر شام” (ههتهشێ) ڤە تێن کرن و بال کشاند سەر وێ یەکێ کو “دەولەتا ترک پشتگریا ڤان کۆمان دکە.” هەروها قارایلان هشیاری دا کو ئارمانجا ڤان ئێرشان تونەکرنا دەستکەفتیێن گەلێ کوردە.
ئەڤ داخویانیا قارایلان د دەمەکێ دە تێ، ل چەندین ئەنیێن وەکی کۆبانێ و حەسەکێ د ناڤبەرا هێزێن سووریەیا دەمۆکراتیک (ههسهدێ) و کۆمێن چەکدار دە شەرەکی گران هەیە. ههسهدێ راگهاند کو وان هەموو ئێرشێن ل سەر ڤان باژاران تێک برنە.
ل ئالیێ دن، خەلکێ سڤیلێ ل رۆژئاڤایێ کوردستانێ ژ دوهـ ڤە داکەتیە کۆلانان و ئامادەهیا خوە یا ژ بۆ شەر نیشان دایە. گەلەک وەلاتیان راگهاندنە کو ئەوێ مل ب ملێ شەرڤانێن ههسهدێ ئاخا خوە بپارێزن.
هەر وها ل باژارێن باشوورێ کوردستانێ ژی، ب سەدان وەلاتی داکەتن کۆلانان و پشتگریا خوە ژ بۆ رۆژئاڤایێ کوردستانێ نیشان دان. وەلاتیێن ل باشوور بانگ ل جڤاکا ناڤدەولەتی دکن کو ل هەمبەری ئێرشێن کۆمێن چەکدارێن رادیکال بێدەنگ نەمینن.
