ھەسەدێ پابەندبوونا خوەیا تەمام ب ئاگربەستا لگەل شامێ راگھاند
فەرمانداریا گشتی یا ھێزێن سووریەیا دەمۆکراتیک (ھەسەد)ێ د راگھاندنەکێ دە ب رەنگەکێ فەرمی پابەندبوونا خوەیا تەمام ب وێ ئاگربەستێ تەکەز کر، یا کو لگەل حکوومەتا شامێ ھەڤفێمکرن ل سەر ھاتیە کرن. ھەروەسا راگھاند کو، ھەتا کو ئێریش ل سەر وان نەیێ کرن، ئەو پێشەنگیێ ژ بۆ چ کریارەکا لەشکەری ناکن و ژ بۆ بجھانینا پەیمانا 18ێ ڤێ مەھێ ئامادە نە.
فەرمانداریا گشتی یا ھێزێن سووریەیا دەمۆکراتیک (ھەسەد)ێ ئیرۆ رۆژا سێشەمب، 20/1/2026ێ، راگھاندنەک ل سەر رەوشا مەیدانی و ئاگربەستا 18ێ چلەیێ یا کو د ناڤبەرا وێ و حکوومەتا شامێ دە ھاتیە ئیمزەکرن بەلاڤ کر.
د وێ راگھاندنێ دە ھاتیە گۆتن: ئەم پابەندبوونا ب تەڤاھی یا ھێزێن خوە ب وێ ئاگربەستێ رادگھینن یا کو لگەل حکوومەتا شامێ ھەڤفێمکرن ل سەر ھاتیە کرن.
ھەسەدێ تەکەز ل سەر وێ یەکێ ژی کریە کو، ئەو پێشەنگیێ ژ بۆ چ کارەکێ لەشکەری ناکن، ژ بلی کو ھەکە ل پاشەرۆژێ ھێزێن وان رووبروویی ئێریشێ ببن.
فەرمانداریا گشتی یا ھەسەدێ د بەشەکا دن یا وێ راگھاندنێ دە ئامادەبوونا خوە ژ بۆ چارەسەریا ئاشتیانە نیشان دا و راگھاند: ئەم تەکەز دکن کو ئەم ژ بۆ رێیێن سیاسی و چارەسەریان ب رێیا دانوستاندنان و دیالۆگێ ڤەکری نە.
ھەسەدێ د داویا راگھاندنا خوە دە ژی ئاماژە دا: ئەم ژ بۆ بجھانینا پەیمانا 18ێ چلەیێ ئامادە نە، ب وی ئاوایی کو خزمەتا ئارامکرنا رەوشێ و تەناھیێ دکە.
