سەرۆک بارزانی: ت کەس و ئالی نکارن دەستدرێژیێ ل سەر هەرێما کوردستانێ بکن

سەرۆک مەسعوود بارزانی ل پایتەختا ئیتالیایێ سەردانا بالیۆزخانەیا ئیراقێ کر و د داخویانیەکە راگهاند، “هەرێما کوردستانێ ب هێزا پێشمەرگەیان پاراستییە، ت کەس و ئالی نکارن دەستدرێژیێ ل سەر هەرێما کوردستانێ بکن.”

سەرۆک مەسعوود بارزانی ئیرۆ 22ێ چلەیا 2026ان، د چارچۆڤەیا سەردانا خوە یا فەرمی یا بۆ ئیتالیایێ دە، سەردانا بالیۆزخانەیا ئیراقێ یا ل رۆمایێ کر. سەرۆک بارزانی د کۆنفەرانسەکە رۆژنامەڤانیێ دە ل سەر رەوشا ئەولەهیا کوردستانێ، پشتگریا ژ بۆ رۆژئاڤا و مەترسیا داعشێ داخویانیێن گرنگ دان.

سەرۆک بارزانی بال کشاند سەر رەوشا ئالۆزا هەرێمێ و گۆت: “ئەم د هەرێمەکێ دە دژین کو تژە کێشە، شەر و ئالۆزییە. لێ ئەز دکارم ڤێ سۆزێ بدم کو کوردستان خوەدی پێشمەرگەیە و ب داخوازا خوەدێ ت کەس نکارە دەستدرێژیێ بکە سەر هەرێما کوردستانێ.”

مژارەکە دن یا کۆنفەرانسێ، خوەپێشاندانێن کوردان یێن ل ئەورۆپا و پارچەیێن دن یێن کوردستانێ بوون کو ژ بۆ پشتگریا رۆژئاڤایێ کوردستانێ تێن کرن. سەرۆک بارزانی سپاسیا خوەپێشاندەران کر و گۆت: “جهێ دلخوەشیێیە کو گەلێ کورد ل هەر دەرێ پشتگریا هەڤدو دکە. ئەڤ یەکیتیا نەتەوەیی، تشتێ هەری باش و گرنگە.”

دەر بارێ مژارا گەرما ڤەگوهاستنا گرتیێن داعشێ ژ سووریێ بۆ ئیراقێ دە، سەرۆک بارزانی دیار کر کو هین هەژمارا وان ب هوورگولی نە دیارە، لێ دەستنیشان کر کو ئیراق ژ بۆ ڤان گرتیان جیهەکی ئەولەترە. سەرۆک بارزانی گۆت: “ژ بۆ ئەولەهیێ چێترە کو زندانیێن داعشێ د گرتیگەهێن ئیراقێ دە بن، نە کو ل سووریێ سەربەست و بەردایی بن.”