مەسروور بارزانی: مە کاری راستیێن رۆژئاڤایێ کوردستانێ بگهینن سەرکردەیێن جیهانێ

سەرۆکێ حکوومەتا هەرێما کوردستانێ مەسروور بارزانی ل داڤۆسێ کۆنفەرانسەکا رۆژنامەڤانی ل دار خست و راگهاند؛ مە کاری راستیێن رۆژئاڤایێ کوردستانێ بگهینن سەرکردەیێن جیهانێ.

سەرۆکێ حكوومه‌تا هەرێما کوردستانێ مەسروور بارزانی ئیرۆ (پێنجشەم، 22.01.2026) ل داڤۆسێ د کۆنفەرانسەکا رۆژنامەڤانی دە گۆت: ل داڤۆسێ چەند مژار هەبوون کو ئەم ل سەر وان باخڤن. یا یەکێ، دڤێ ئەم تێکلیێن بازرگانی ب وەلات و شیرکەتێن جیهانێ رە باشتر بکن و زێدەتر دەریان ژ بۆ ڤەبەرهێنانێ ل هەرێما کوردستانێ ڤەکن.

مەسروور بارزانی ئاماژە ژی دا: رەوشا رۆژئاڤایێ کوردستانێ ژی مژارەکا دن یا هەڤدیتنێن مە بوو. مە بال کشاند سەر بدەستخستنا پشتگریا ناڤنەتەوەیی ژ بۆ بداویکرنا شەر و راوەستاندنا ئێریشێن نەرەوایێن ل سەر کوردێن رۆژئاڤایێ کوردستانێ. مە ئەڤ مژار ب رەنگەکێ جدی ب سەرکردەیێن جیهانێ رە نیقاش کر و ئەز هێڤی دکم کو ئەنجام هەبە و تەناهی ل دەڤەرێ پەیدا ببە.

رۆن ژی کر: مه‌ کاری د جڤینێن خوە دە ل داڤۆسێ رەوشا رۆژئاڤایێ کوردستانێ بەرچاڤ بکن و ژ ئالیەکێ دن بزاڤێن جدی بکن ژ بۆ ئاڤاکرنا ئاشتیێ و بداویکرنا شەر. ئەز هێڤی دکم کو ئەو ترس د ناڤ خەلکی دە نەمینە و ئاشتی بێ بجهانین. هەر چەند ئەم ژ بۆ مژارێن ئابۆری هاتنە داڤۆسێ ژی، لێ رەوشا رۆژئاڤایێ کوردستانێ و راوەستاندنا شەر ل وێ دەڤەرێ بوویە مژارا سەرەکە یا نیقاش و هەڤدیتنێن مە ب سەرۆکێن و سەرکردەیێن جیهانێ رە.

ئاماژە ژی دا: ئیرۆ ل هەولێرێ د ناڤبەرا مەزلووم عەبدی و تۆم باراك دە جڤینەک هاتیە کرن. تشتێ کو ئەز دزانم ئەڤە کو، هەر دو ئالی هەما ببێژە گهیشتنە وێ لهەڤکرنێ کو ئاگربەستا ل رۆژئاڤا بەردەوام بە. دەرفەتەک بێ دان کو، ئەو بگهیژن هەڤفێمکرنەکا دوئالی دا کو ئاشتی و تەناهی پەیدا ببە. ئەز هێڤی دکم کو شەر جارەکا دن دەرنەکەڤە.

مەسروور بارزانی هەروەسا راگهاند: تو کەسەک ب شەر و ئالۆزیان رە نینە. هەر کەسێ کو مە پێ رە هەڤدیتن کر دگۆت کو، دڤێ شەر زوو ب داوی ببە. یا گرینگ نها ئەوە کو، دڤێ ئاگربەست بەردەوام بکە دا کو ئەو زەختا دەروونی ل سەر گەلێ کوردستانێ نەمینە.