ھەسەدە: حکوومەتا شامێ ئاگربەستێ بنپێ دکە و ل جزیرێ و کۆبانێ ئامادەکاریێن شەری دکە
ناڤەندا راگھاندنا ھێزێن سووریەیا دەمۆکراتیک (ھەسەدێ) ھشیاری دا کو حکوومەتا شامێ تەڤی ئاگربەستێ، ئامادەکاریێن خوەیێن لەشکەری ل ھەرێمێن جزیرێ و کۆبانێ ب ئاوایەکی سیستەماتیک زێدە دکە.
ناڤەندا راگھاندنا ھەسەدێ ئیرۆ 24ێ چلەیێ ب داخویانیەکێ راگھاند، تەڤگەرێن لۆژیستیک و سەوقیاتا لەشکەری یا حکوومەتا شامێ ل دەردۆرا ھەرێمێن جزیرێ و کۆبانێ ھاتیە شۆپاندن. ھەسەدێ دیار کر، ئەڤ تەڤگەر نیشانەیا نیەتا شامێ یا ژ بۆ زێدەکرنا گرژیێ و پالدانا ھەرێمێ بەر ب شەرەکی نوو ڤەیە.
ھەسەدێ ئەشکەرە کر کو تەڤی ئاگربەستا د ناڤبەرا وان و حکوومەتێ دە، ئیرۆ ل ھەرێما جزیرێ دو ئێریشێن جودا ل دژی ھێزێن وان پێک ھاتنە. ھەسەدێ ئەڤ ئێریش وەکی “بنپێکرنا زەلال یا ئاگربەستێ” پێناسە کرن و دەستنیشان کر کو تەڤگەرێن شامێ ل دژی ھەموو پابەندبوونێن سیاسی نە.
د داخویانیێ دە ھات گۆتن: “ھێزێن مە ھەتا نھا پابەندی بەندێن ئاگربەستێ بوونە، لێ ئامادەکاریێن حکوومەتا شامێ ھەولدانێن ب مەبەستن ژ بۆ تێکبرنا ئاگربەستێ و ئاستەنگکرنا چارەسەریێن سیاسی.”
ھەسەدێ بانگ ل جڤاکا ناڤدەوەتی و ئالیێن پەیوەندیدار کر کو بلەز بکەڤن ناڤ ھەولدانان، دا کو شام پابەندی ئاگربەستێ ببە. ھات دەستنیشانکرن کو ئەڤ گاڤێن گرژیێ، گەفان ل ئەولەھی و ئارامیا ھەرێمێ دخون و دڤێت پێشی ل ڤان ئامادەکاریێن لەشکەری وەرە گرتن.
ھێزێن سووریەیا دەمۆکراتیک د داویا داخویانیا خوە دە جارەکا دن دیار کر، ئەو ئالیگرێ چارەسەریا سیاسی نە، لێ ل ھەمبەری ھەر جورە ئێریش و بنپێکرنان ژی ئامادە نە.
