ھەسەدە: ل گوندەوارێ کۆبانی شەرەکی گران ھەیە؛ شامێ ئاگربەست بنپێ کر
ناڤەندا راگھاندنێ یا ھێزێن سووریەیا دەمۆکراتیک (ھەسەدێ) راگھاند، کۆمێن چەکدارێن سەر ب حکوومەتا شامێ ڤە، ئێرشێن خوەیێن ل سەر گوندەوارێ باژارێ کۆبانی نوو کرنە. ھەسەدێ دەستنیشان کر کو ئەڤ ئێرش بنپێکرنا ئەشکەرەیا ئاگربەستا کو بەریا دو رۆژان ھاتبوو راگھاندنە.
ل گۆری داخویانیا ھەسەدێ، بەربانگا ڤێ سبەھێ رۆژا دوشەمبێ 26ێ چلەیێ، کۆمێن سەر ب شامێ ڤە ژ گەلەک ئالیان ڤە ئێرشەکە بەرفرەھ برن سەر گوندێن خەرەب ئیشک و چەلەبیێ یێن کو دکەڤن باشوورێ رۆژھلاتێ کۆبانی. ھات دیارکرن، ئێرش ب چەکێن گران و تۆپبارانێ ھاتیە کرن و گوندێن کو شێنیێن سڤیل تێ دە نە، ھاتنە ھەدەفگرتن.
ھەسەدێ ئەشکەرە کر کو پشتی دەستپێکرنا ئێرشان، د ناڤبەرا شەرڤانێن وان و کۆمێن ئێرشکار دە شەر و پەڤچوونێن دژوار دەرکەتنە. د داخویانیێ دە ھات گۆتن: “ھێزێن مە بەرسڤا ڤان ئێرشان ددن و نھا ل گوندێ چەلەبیێ شەرێن پر گران بەردەوام دکن.”
ھەر وھا ھات راگھاند، کۆمێن چەکدار ھێزەکا زێدەترا پشتەڤانیێ، د ناڤ دە تانک و پانزێر، ئانینە ھەرێمێ و درۆن ب چری ل سەر ئاسمانێ ھەرێمێ دگەرن.
ھەسەدێ بال کشاند سەر پەیمانا ئاگربەستێ یا کو تەنێ دو رۆژ بەرێ کەتبوو وارێ جبجیکرنێ و ئەڤ ئێرش وەکی “بنپێکرن” ب ناڤ کر. ھەسەدە وھا دبێژە: “ئەڤ نیشان ددە کو حکوومەتا شامێ پابەندی سۆزێن خوە نابە و دخوازە ئارامیێ ل ھەرێمێ تێک ببە.”
د داویا داخویانیا خوە دە، ھەسەدێ تەکەز کر، پاراستنا گەل و ئاخێ مافێ وانێ رەوایە و حکوومەتا شامێ ژ ئەنجامێن ڤان ئێرشان بەرپرسیار گرت. ھەر وھا بانگ ل ھێزێن گارانتۆرێن ئاگربەستێ کر کو بەرپرسیاریا خوە بجھ بینن و ژ بۆ راوەستاندنا ڤان ئێرشێن شامێ تاڤلێ دەستوەردانێ بکن.
