ھێزێن رووسیایێ ژ قامشلۆ ڤەدکشن

ھێزێن رووسیایێ پشتی 7 سالان، دەست ب ڤەکشینا ژ فرۆکخانەیا قامشلۆیێ کرن. ل گۆری زانیاریان، رووسیا تانک و ئاموورێن خوەیێن لەشکەری بەر ب ھەرێما لازقیێ ڤە ڤەدگوھێزە.

ل گۆر ئاگاهیان، چەند رۆژن لڤ و تەڤگەرا ڤەکشینێ یا ھێزێن رووسی بەردەوام دکە، لێ ئیرۆ دوشەمبێ 26ێ چلەیا 2026ێ، بەری نیڤرۆ، کاروانەکێ لەشکەری کو ژ گەلەک تانک و زرێپۆشان پێک دھات، ژ فرۆکخانەیێ دەرکەت و دەست ب ڤەکشینێ کر.

زانیاری دیار دکن کو لەشکەر، وەساییت و ھەموو ئاموورێن لۆژیستیک و لەشکەری ژ فرۆکخانەیا قامشلۆ بەر ب بنگەھێن رووسیایێ یێن ل باژارێ لازقیەیێ ل بەراڤا سووریەیێ تێن ڤەگوھاستن.

رووسیایێ ژ سالا 2019ێ ڤە فرۆکخانەیا قامشلۆیێ وەکی ناڤەندەکە سەرەکە ژ بۆ چاڤدێریکرنا باکور و رۆژھلاتێ سووریەیێ و شەرێ ل دژی داعشێ بکار دئانی. ڤالاکرنا ڤێ فرۆکخانەیێ وەکی گوھەرتنەکە گرینگ د ھەڤسەنگیێن لەشکەری یێن ل ھەرێمێ دە تێ دیتن.

ئەڤ ڤەکشینا رووسیایێ د دەمەکێ دەیە، د ناڤبەرا ھێزێن سووریەیا دەمۆکراتیک (ھەسەدێ) و ئارتێشا سووریەیێ دە ئاگربەستەک ھەیە. تەڤی ئاگربەستێ ژی، گرژی ل ھەرێمێ بەردەوام دکە.