سەرۆک بارزانی: پشتەڤانیا رەڤەندا کوردستانی ل رۆژئاڤایێ کوردستانێ جھێ سەربلندیێیە
سەرۆک بارزانی د پەیامەکی دە ژ بۆ کوردستانیێن ل دەرڤەیی وەلات، تەڤی پەسندایینا ژ بۆ رۆژئاڤایێ کوردستانێ، تەکەز دکە کو کورد پارێزڤانێ مرۆڤاتیێ بوونە و نھا دەما وێیە کو مرۆڤاتی پارێزڤانێ کوردستانێ بە، ھەروەھا داخوازا چارەسەریا پرسگرێکان ل سووریێ دکە.
ناڤەرۆکا پەیاما سەرۆک بارزانی:
بناڤێ خوەدایێ مەزن و دلۆڤان
کوردستانیێن هێژا، برێز خویشک و برایێن عەزیز
جھێ سەربلندیێیە کو ئیرۆ ل باژارێن وەلاتێن ئاورۆپایێ، ھەژمارەکا پر ژ رەڤەندا کورد ب جۆش و کەلەجان و ب ئاوایەکی بێ وێنە د کۆمبوونەکا ئاشتیانە دە، پشتەڤانیا خویشک و برایێن خوە ل رۆژئاڤایێ کوردستانێ دکن.
ئەم ئاماژەیەکا زەلالە ژ بۆ ھێز و زندیبوونا رەڤەندا کوردی ل دەرڤەیی وەلات، ئەڤ ژی ئیسپات دکە کو نفشێ گەلێ مە ل دەرڤەیی وەلات، ھەرتم ھێزەکە مەزن و ئامادە و یەکگرتیە، ژ بۆ پشتەڤانیکرنا ل دۆزا رەوا یا گەلێ کوردستانێ ل ھەر بەشەکێ کوردستانێ بە. سلاڤ و رێزێن من یێن حەزکری ژ وە رە ھەنە. ھوون خێرھاتنە سەرچاڤان.
د سەدسالا 20ێ دە کوردستان ب ئاوایەکی نەحەق ھات دابەشکرن. پشتی ڤێ دابەشکرنێ، گەلێ مە ب گەف، مەترسی و ئێشێن مەزن رە رووبروو ما. لێ ئەڤ شەرت و مەرجێن گران نە بوون سەدەم کو گەلێ مە ئیرادەیا خوە وندا بکە. بەرەڤاژی ڤێ، گەلێ کوردستانێ رۆژ ب رۆژ ھشیارتر و بھێزتر خەباتا خوەیا ژ بۆ مسۆگەرکرنا مافێن خوە بەردەوام کر.
ھەروەکی بەشێن دن یێن کوردستانێ، ل رۆژئاڤایێ کوردستانێ ژی گەلێ کورد خەباتەکا وێ یا دوور و درێژ ھەیە. تێکۆشەر و شۆرەشگەرێن رۆژئاڤایێ کوردستانێ زیندان، ئازار و ئاوارەیێن زێدە دیتن. وان ب قەھرەمانیا خوە و ب خوینا جوانێن خوە داعش تێک برن و بوون پارێزڤانێن مرۆڤاھیێ. ئیرۆ دیسا ئەڤ گەل رووبروویی گەفێن نوو و رەوشەکە ئالۆز بوویە. ژ بەر ڤێ یەکێ ئەرکا نیشتمانی و نەتەوەیی یا ھەر کوردەکییە کو پشتگریا خوشک و برایێن خوەیێن ل رۆژئاڤا بکە.”
نھا گەلێ مە ل رۆژئاڤایێ کوردستانێ راستی گەفەکا نوو و رەوشەکا ئالۆز و مەترسیدار ھاتیە. ئەرکێ نیشتمانی و نەتەوی یێ ھەر کوردستانیەکییە کو ئەم پشتەڤانیا خویشک و برایێن خوە ل رۆژئاڤایێ کوردستانێ بکن.
دەنگێ ھەر یەک ژ وە باندۆرەکا خوە یا تایبەت ل سەر مۆرال و بەرخوەدانا گەلێ کورد ل کوردستانێ، ب تایبەتی ل رۆژئاڤایێ کوردستانێ، و پەیامەکە ژ بۆ گەلێن جیھانێ کو پشتگرییا داخواز و مافێن رەوایێن خوشک و برایێن مە بکن.
ئەرکا جڤاکا ناڤنەتەوەیی و وەلاتێن رۆژئاڤایییە کو بەرپرسیاریا خوە بگرن سەر خوە و نەھێلن کو ئێش و ئازارێن گەلێ مە دوبارە ببن. کورد د شەرێ ل دژی داعشێ دە پارێزڤانێن مرۆڤاھیێ بوون. نھا دڤێت مرۆڤاھی پارێزڤانێن کوردستانێ بە.
ئامادەبوویێن برێز و کوردستانیێن هێژا
خوەپێشاندان و میتینگێن وە نیشانەک ئەشکەرەیا یەکیتیا نەتەوەیی د دلێ کوردێن ل دەرڤەیی وەلات دە نە. ئەڤ یەک وێ راستیێ نیشان ددە کو جوداھیێن سینۆران و رامانێن سیاسی نکارن تێکلیێن دیرۆکی و نەتەوەیی د دلێ مە دە لاواز بکن. ئەم یەک نەتەوە نە، و یەک دیرۆک ھەیە. ئەم ھەمان پێشەرۆژێ پارڤە دکن، و د شاھی و نەخوەشیان دە پارڤە دکن. کوردبوونا مە ژ ھەر ئایدۆلۆژیێ پێشترە. کوردبوون پەیامەک ئاشتی و ژیانا ھەڤبەشە، نە تەنێ ژ بۆ گەلێ مە، لێ د ھەمان دەمێ دە ژ بۆ گەلێن ھەرێمێ و تەڤاھیا جیھانێ ژی.
ئەز دخوازم یەک ب یەک سپاسیا وە، ئۆرگانیزاتۆرێن ڤێ میتینگێ و کۆنفەدەراسیۆنا رەڤەندا کوردستانێ بکم. ئەز دخوازم سپاسیا ھەموو کوردێن ل دەرڤەیی وەلات بکم کو د رۆژێن داوی دە ب وێرەکی و جۆشەک مەزن پشتگری دانە خوشک و برایێن خوەیێن ل رۆژئاڤا. ئەز وە پیرۆز دکم، ئەڤ ژ وە تێ ھێڤیکرن. دڤێ پشتگرییەک وسا د چارچۆڤەیا رێبازێن ئاشتیانە و سڤیل دە بەردەوام بکن.
داخوازا من ئەوە کو ھوون د جڤین و مەراسیم و خوەپێشاندانان دا ب تەڤاھی پێبەندی نرخێن گەلێ مە بن و پێبەندی یاسایێن وی وەلاتی بن کو ھوون تێ دە دژین. ب ھەمی ئاوایەکی خوە ل ئالۆزی و تەڤلیھەڤی و توندوتیژیێ دوور بخن. گەلێ کوردستانێ پرسگرێکا وێ ل گەل سیاسەتا حکوومەت و رێژیمان ھەیە، و چ پرسگرێکەکا وێ ل گەل نەتەوان دە نینە، دڤێت ھەموو ئاگاھدارێ وێ بن، کو نابە د ناڤبەرا کورد و نەتەوێن دن دە پرسگرێک و زەخت ئاڤا ببە. پەیاما گەلێ کوردستانێ پەیاما ئاشتی و مرۆڤ ھەزی و پێکڤە ژیانە.
ھەر وھا ئەز پێویست دبینم کو بانگ ل حکوومەتا سووریێ و ھێزێن ھەسەدێ بکم کو ئاگربەستا د ناڤبەرا خوە دە بدۆمینن. ژ بۆ چارەسەرکرنا پرسگرێک و ناکۆکیێن خوە، خوە بسپێرن دیالۆگ و تێگھیشتنێ و ب تو ئاوایی نەھێلن کو پرسگرێکێن سیاسی ببن سەدەما ناکۆکی و پرسگرێکێن نەتەوەیی د ناڤبەرا کورد و عەرەبان دە.
ژ بۆ پێکانینا ئاشتی و ئارامیێ، دڤێت ئێش و ئازارێن گەلێ کورد و ھەولدانێن ژ بۆ ھلوەشاندنا وان ب داوی ببن و مافێن سیاسی، سڤیل و نەتەوەیی یێن گەلێ کورد د دەستوورا بنگەھین دە د پێشەرۆژا سووریێ دە وەرن گارانتیکرن.
د داویێ دە، ئەز دخوازم دوبارە بکم کو دڤێت ئەم ھەموو پشتگریا خوە ژ بۆ دۆزا رەوایا گەلێ خوە خورت بکن، و دڤێت ئەم ھەر گاڤ ھێڤی و پێشەرۆژەکا مەیا گەش ژ بۆ گەلێ مەیێ کوردستانێ ھەبە.
جارەکە دن بخێرھاتنا وە دکم، ب خێر بێن سەرچاڤان. بژی کورد، بژی کوردستان
مەسعوود بارزانی 31/1/2026
