ب بەشداریا سەرۆکوەزیر مەسروور بارزانی، لووتکەیا جیهانی یا حكوومهتان ل دوبهیێ تێ لدارخستن
سەرۆکوەزیرێ هەرێما کوردستانێ مەسروور بارزانی، ژ بۆ بەشداربوونا د لووتکەیا جیهانی یا حكوومهتان یا 2026ان دە گهیشت دوبهیێ و ئیرۆ دەست ب هەڤدیتنێن خوە یێن دیپلۆماتیک دکە.
ل باژارێ دوبهیێ یێ میرنشینێن عەرەبی یێن یەکبوویی (ئیمارات)، ئیرۆ 3ێ سباتێ “لووتکەیا جیهانی یا حكوومهتان” ب بەشداریا گەلەک سەرکردە و بەرپرسێن پایەبلندێن جیهانێ دەست پێ دکە. سەرۆکوەزیر مەسروور بارزانی دوهـ ئێڤارێ، ل سەر ڤەخوەندنەکە فەرمی یا جیگرێ سەرۆک و سەرۆکوەزیرێ ئیماراتێ و حاکمێ دوبهیێ شێخ محەمەد بن راشد ئال مهکتووم، گهیشت فرۆکخانەیا دوبهیێ و ژ ئالیێ وەزیرێ دادێ یێ ئیماراتێ عهبدوللا ئەلنوئامی ڤە هات پێشوازیکرن.
تێ چاڤەرێکرن کو سەرۆکوەزیرێ هەرێما کوردستانێ د پەراویزا ڤێ لووتکەیێ دە، رێزەچالاکی و جڤینان ل گەل بەرپرسێن بلندێن ئیماراتێ و سەرکردەیێن وەلاتێن بەشدار پێک بینە.
د ڤان هەڤدیتنان دە، دێ خورتکرنا پەیوەندیێن دوقۆلی، گەشەدانێن داوی یێن ل ئیراقێ و گوهەرتنێن سیاسی و ئەولەهی یێن ل ناڤچەیێ وەرن گۆتووبێژکرن. سەرۆکوەزیر بارزانی دێ نێرینا هەرێما کوردستانێ یا دەربارێ رێڤەبەری و هەڤکاریا ناڤدەولەتی دە ب بەشدارێن لووتکەیێ رە پارڤە بکە.
لووتکەیا جیهانی یا حكوومهتان، سالانە ل دوبهیێ تێ لدارخستن و پلاتفۆرمەکە گرنگە ژ بۆ نیقاشکرنا ئایەندەیا حكوومهتان، تەکنۆلۆژی، ئابۆری و رووبرووبوونا پرسگرێکێن جیهانی.
