سەرۆک بارزانی: گەلێ کوردستانێ نیشان دا کو د خوەشی و نەخوەشیێ دە پشت و پەنایێ هەڤە
سەرۆک مەسعوود بارزانی ب داخویانیەکێ سپاسیا گەلێ کوردستانێ کر، ژ بۆ وێ پشتگریا دلسۆزانە و کۆمکرنا ئالیکاریان ژ بۆ رۆژئاڤایێ کوردستانێ. سەرۆک بارزانی راگهاند، گەلێ کوردستانێ جارەکە دن نیشانی جیهانێ دا کو د ناڤا هەر شەرت و مەرجی دە پشت و پەنایێ هەڤدونە.
سەرۆک مەسعوود بارزانی ئیرۆ 4ێ سباتا 2026ان، پەیامەکە سپاسیێ پێشکێشی وەلاتیێن کوردستانێ، دەزگەهێن خێرخوازی و مەدیایێ کر، کو ب ئاوایەکی چالاک بەشداری کامپانیایا ئالیکاریێ یا ژ بۆ رۆژئاڤایێ کوردستانێ بوونە.
سەرۆک بارزانی د پەیاما خوە دە گرنگیا ڤێ پشتگریێ دەستنیشان کر و گۆت: “ئەز گەلەکی سپاسیا هەموو وەلاتیێن خوەشدڤییێن کوردستانێ دکم ژ بۆ بەرسڤدانا وانا دلسۆزانە د کۆمکرنا ئالیکاری و ئالیکاریا خوشک و برایێن مەیێن ل رۆژئاڤایێ کوردستانێ دە. ئەڤ هەلوەستا وان دیرۆکییە و جهێ شانازی و پێزانینێ یە.”
سەرۆک بارزانی ب تایبەتی سپاسیا دەزگەها خێرخوازی یا بارزانی و هەموو رێخستن، کەسایەتی و دەزگەهێن مەدیایێ کر کو د کۆمکرن و گهاندنا پێدڤیان دە رۆلەکە سەرەکە لیستنە. سەرۆک بارزانی دیار کر کو وان ئەرکەکی نەتەوەیی و نیشتمانی ب ئاوایەکی هەری باش ب جهـ ئانینە و ئەڤ یەک ژی دبە سەدەما بلندبوونا هەستا وەلاتپەروەریێ د ناڤا جڤاکێ دە.
د داویا پەیاما خوە دە، سەرۆک بارزانی تەکەزی ل سەر یەکیتیا گەلێ کوردستانێ کر و وها گۆت: “خەلکێ خۆشتڤی یێ کوردستانێ جارەکە دن ئەو راستی ژ بۆ هەموو جیهانێ دوبارە کر کو گەلێ کوردستانێ د خوەشی و نەخوەشیێ دە هەڤپار، هەڤخەم و پشت و پەنایێ هەڤدونە.”
ئەڤ پەیاما سەرۆک بارزانی پشتی دەستپێکرنا پێلەکە بەرفرەها ئالیکاریان ژ هەرێما کوردستانێ بەر ب رۆژئاڤایێ کوردستانێ ڤە هات، کو پشتی دۆرپێچا ل سەر هەرێمێن رۆژئاڤا، پێدڤیەکە مەزن یا خەلکێ هەرێمێ ب خورەک، دەرمان و سۆتەمەنیێ هەبوو.
