هوورگلیێن پەیمانا شام و ههسهدێ؛ ژ ڤەکشینا هێزان هەتا ڤەکرنا رێیان
دەستەیا ئۆپەراسیۆنێن ئارتێشا سووریەیێ ئەشکەرە کر کو، پشتی جڤینا ب نوونەرێن هێزێن سووریەیا دەمۆکراتیک (ههسهدێ) رە ل حەسەکەیێ، لهەڤکرن ل سەر دەستپێکرنا بجهانینا قۆناغ ب قۆناغ یا پەیمانان چێ بوویە، کو ڤەکشینا هێزان ژ باژاران و لەزاندنا پێڤاژۆیا تەڤلیهەڤبوونێ ڤەدگرن.
دەستەیا ئۆپەراسیۆنێن ئارتێشا عەرەبی یا سووریەیێ دوهی (ئهینی، 6ێ سباتا 2026ێ) د داخویانیەکێ دە هوورگولیێن جڤینێ و گەرا مەیدانی یا هەڤپار ب نوونەرێن هێزێن سووریەیا دەمۆکراتیک (ههسهدێ) رە ل پارێزگەها حەسەکەیێ ئەشکەرە کر.
ل گۆری راگهاندنا دەستەیا ئۆپەراسیۆنان، شاندەیەکا پایەبلند یا وێ دەستەیێ ل گەل هەژمارەکا ئەفسەر و فەرماندارێن ئارتێشا سووریەیێ هەڤدیتنەک ب نوونەرێن ههسهدێ رە کریە.
پشتی وێ هەڤدیتنێ، وان ب هەڤ رە گەشتەکا مەیدانی ژ بۆ چەند دەڤەر و جهێن جودا جودا ل پارێزگەها حەسەکەیێ کریە، کو ب گۆتنا وان، “ژینگەهەکا ئەرێنی سەردەست بوویە”.
دەستەیا ئۆپەراسیۆنان ئارمانجا سەرەکە یا جڤین و گەرا خوە یا مەیدانی ژ بۆ “دەستپێکرنا بجهئانینا مەیدانی یا پەیمانا د ناڤبەرا دەولەتا سووریەیێ و ههسهدێ دە” ڤەگەراندیە. ئاماژە ژی دا کو، هەر دو ئالی ل سەر قۆناغا دەمکی یا بجهئانینا بەندێن وێ پەیمانێ د چەند رۆژێن بێ دە گهیشتنە لهەڤکرنێ.
د دەرهەقا ناڤەرۆکا وێ پەیمانێ و پێنگاڤێن کریارکی دە، دەستەیا ئۆپەراسیۆنێن ئارتێشا سووریەیێ رۆن ژی کر کو ئەو پەیمان ڤان خالان ڤەدگرە:
– ڤەکشینا هێزان ژ دەڤەرێن سڤیل بۆ خالێن لەشکەری یێن دیارکری.
– ڤەکرنا رێیان و راکرنا ئاستەنگیان.
– هەڤاهەنگی و ئالیکاری د پێڤاژۆیا پووچکرنا مینان دە.
– لەزاندنا پێڤاژۆیا تەڤلیهەڤکرنێ د ناڤبەرا هێزان دە.
ئەڤ پێنگاڤ وەکی وەرچەرخانەکا گرینگ د تێکلیێن د ناڤبەرا شام و هێزێن سووریەیا دەمۆکراتیک (ههسهدێ) دە تێ دیتن، ب ئارمانجا زێدەتر تەناهیێ ل دەڤەرێن رۆژئاڤایێ کوردستانێ.
