دادگەهێ ژ بەر بێرێزییا ل شێخ سەعید جەزا دا ئومیت ئۆزداغ

سەرۆکێ گشتییێ پارتیا زافەرێ ئومیت ئۆزداغ ، ژ بەر پارڤەکرنەکە خوە یا ل سەر مەدیایا جڤاکی یا ل سەر رێبەرێ کورد شێخ سه‌عید، 6 هەزار و 500 لیرەیێن ترکی جەزایێ پەرەیێ لێ هات برین.

نەڤیێن شێخ سه‌عید، ژ بەر پارڤەکرنەکە ئومیت ئۆزداغ یا کو تێ دە بێرێزی ل شێخ سه‌عید کربوو، 9ێ چریا پاشین یا 2024ان سەری ل دادگەهێ دابوو و گلی کربوو.

ل سەر ڤێ گلیێ، ل دادگەها جەزایان یا پارێزگەها ئەرزرۆمێ دۆز هاتبوو ڤەکرن.

روونشتنا بریارێ یا دۆزێ دۆهـ هات لدارخستن و دادگەهێ بریارا خوە ئەشکەرە کر.

دادگەهێ دیار کر کو پارڤەکرنا ژ حەسابێ Xێ ب ناڤێ «ئومي تۆزداغ» هاتیە کرن، سووجێ «ب ئاوایەکی ئەشکەرە بێرێزی ل ببیرئانینا کەسەکی» پێک ئانیە.

دادگەهێ بال کشاند سەر وێ یەکێ کو پارڤەکرن ژ حەسابەکی کو ژ هەر کەسی رە ڤەکریە هاتیە کرن و رەوشا “ئەشکەرەبوونا سووج” ل بەر چاڤان گرت.

هەر وها دادگەهێ مافێ گلیێ یێ نەڤیێن شێخ سه‌عید ژی رەوا دیت.

ئۆزداغ د پاراستنا خوە دە هنجەتێن وەکی “ناسنامەیا سیاسی”، “نیقاشا گشتی” و “نرخاندنا دیرۆکی” پێشکێش کربوون لێ دادگەهێ ئەڤ هنجەت قەبوول نەکرن.