شاندەیا کوردی یا ھەڤبەش ب ئارمانجا گارانتیێن دەستووری دچە شامێ

 پشتی سەردانا شاندا ئەنەکەسێ بۆ شامێ و ھەڤدیتنا لگەل سەرۆکێ سووریەیێ ئەحمەد شەرع، ئامادەکاری ژ بۆ چوونا شاندا کوردی یا ھەڤبەش بۆ شامێ تێ کرن.

ل گۆری ئاگاھیێن ھاتینە بدەستخستن، شاندەیا کوردی یا ھەڤبەش کو ژ ئەنجامێن “کۆنفەرانسا یەکرێزی و ھەلوەستا کوردی” (یا کو د 26ێ نیسانا 2025ێ دە ل قامشلۆ ھاتبوو پێکانین) پێک تێ، ئامادەکاریا سەردانەکە فەرمی بۆ شامێ دکە.

ھەر چەند ھەتا نھا دیرۆکا تەمام یا سەردانێ نەھاتبە دیارکرن ژی، لێ چاڤکانی تەکەز دکن کو شاندەیا ھەڤبەش دێ د دەمەکێ پر نێزیک دە بچە شامێ، دا کو لگەل رایەدارێن حکوومەتا ڤەگوھێز دانوستاندنان بکە.

تێ پایین کو شاندەیا کوردی د جڤینێن خوەیێن ل شامێ دە گرنگیێ بدە پاراستنا مافێن گەلێ کورد و مسۆگەرکرنا وان د دەستوورا بنگەھین دە؛ ھەر وھا پرسێن تێکلداری پێڤاژۆیا دەمۆکراتیزەکرنا سووریەیێ و بەرفرەھکرنا ئازادیێن گشتی و تایبەت، دێ د رۆژەڤا سەرەکی یا ھەڤدیتنان بە.