نەتەوەیێن یەکگرتی: کۆبانێ تەڤی پەیمانا ھەسەدێ و شامێ د رەوشەکا خراب دەیە

 نەتەوەیێن یەکگرتی باندۆرا پەیمانا د ناڤبەرا ھەسەدێ و حکوومەتا سووریەیێ دە ل سەر کێمبوونا توندوتیژیان ئەشکەرە کر و راگھاند: تەڤی ئارامبوونا رەوشێ، هێژ ژی ب دەھان ھەزار کەس ل دەڤەرێن جودا جودا ئاوارەنە و رەوشا خزمەتگوزاریان ل کۆبانیێ د ئاستەکا خراب دەیە.

بەردەڤکا سکرتێرێ گشتی یێ نەتەوەیێن یەکگرتی ستیفان دوجاڕیک ئیرۆ رۆژا سێشەم، 10ی شوباتا 2026ێ، ل سەر پێشھاتێن داویێ یێن سووریەیێ راگھاند کو، تیمێن وێ تێبینیا وێ یەکێ کریە کو، پشتی ئیمزەکرنا پەیمانا 30ی مەھا بۆری یا د ناڤبەرا ھێزێن سووریەیا دەمۆکراتیک (ھەسەدێ) و حکوومەتا شامێ دە، ئاستا شەر و کوشتنان ل سووریەیێ ب رەنگەکێ بەرچاڤ کێم بوویە.

ستیفان دوجاڕیک ل سەر رەوشا مرۆڤی و ئاوارەیان ژی ئاماژە دا کو، تەڤی کێمبوونا شەر ژی، هێژ ژی نێزیکی 160 ھەزار کەسان ل پارێزگەھێن حەلەب، حەسەکە و رەقایێ ئاوارە نە و د شەرت و مەرجێن دژوار دە دژین.

ناڤبری بال کشاند سەر رەوشا باژارێ کۆبانیێ و رۆن کر کو، ئەو بزاڤێ دکن شاندنا ئالیکاریێن مرۆڤی بەردەوام بکن، لێ ئاستەنگیێن مەزن ل پێشیا ڤێ پێڤاژۆیێ ھەنە.

بەردەڤکێ نەتەوەیێن یەکگرتی ھەروەسا گۆت: ل کۆبانیێ هێژ ژی سیستەمێن ئاڤ و ئەلەکتریکێ ب تەڤاھی کار ناکن و پرسگرێکێن مەزن د خزمەتگوزاریێن مرۆڤی دە ھەنە، ھەروەسا ل پرانیا دەڤەرێن کۆبانیێ پێڤاژۆیا خوەندنێ و دەواما دبستانان ھاتیە راوەستاندن.

ستیفان دوجاڕیک ئامارا ئالیکاریان ژی پێشکێش کر و ئەشکەرە کر کو، ھەتا نھا وان 10 کاروانێن ئالیکاریان ژ بۆ کۆبانی و قامشلۆیێ شاندنە، کو ژ 154 بارھلگرآن پێک ھاتنە و ب وێ رێیێ ئالیکاریێن پێدڤی ژ بۆ نێزیکی 190 ھەزار کەسان ژ شێنیێن وان دەڤەران ھاتنە گھاندن.