رویتەرس: ئامەریکا داخوازا ئۆتۆنۆمیێ ژ بۆ کوردێن سووریەیێ دکە

ئاژانسا رویتەرسێ ئاشکەرە کر، واشنگتۆنێ د جڤینا ل میونشنێ دە داخواز ژ رایەدارێن سووریەیێ کریە کو د مژارا داخوازێن کوردان دە نەرم بن و مافێ ئۆتۆنۆمیێ بدن وان.

ل گۆری ئاژانسا رویتەرسێ کو ژ چاڤکانیەکی ئاگاھدار گرتیە، شەڤا بۆری (13/2/2026ێ) د چارچۆڤەیا کۆنفەرانسا ئەولەکاریێ یا میونشنێ دە، جڤینەکا گرینگ د ناڤبەرا وەزیرێ دەرڤەیێ ئامەریکایێ مارکۆ روبیۆ و وەزیرێ دەرڤەیێ سووریەیێ ئەسعەد شەیبانی دە پێک ھات. د جڤینێ دە فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی ژی ئامادە بوو.

رویتەرسێ دیار کر، وەزیرێ دەرڤەیێ ئامەریکایێ مارکۆ روبیۆ داخواز ژ رایەدارێن سووریەیێ کریە کو ھەتا ژ دەستێ وان تێ ل ھەمبەری داخوازێن کوردان نەرم بن. ئامەریکا پشتگریێ ددە کو شێوەیەک ژ “ئۆتۆنۆمیێ” (خوەسەریێ) ژ بۆ کوردان بێ دابینکرن، ب شەرتەکی کو ئەڤ یەک نەبە گەف ل سەر دەستھلاتا ناڤەندی یا شامێ.

ھەمان چاڤکانیێ دەستنیشان کر ژی، واشنگتۆن ھەتا نھا ژ پێشکەتنێن د پێڤاژۆیا یەکخستنا ھێزێن سووریەیا دەمۆکراتیک (ھەسەدێ) و ئارتێشا سووریەیێ دە رازییە. ھەروھا ئامەریکایێ کێفخوەشیا خوە ل سەر جیبجیکرنا رێکەفتنا 29ێ مەھا بۆری (چلەیێ) نیشان دایە.