نێچیرڤان بارزانی و مەزلووم عەبدی رەوشا سووریەیێ و مافێن کوردان نیقاش کرن
سەرۆکێ ھەرێما کوردستانێ لگەل فەرماندارێ گشتی یێ ھەسەدێ جڤیا و پێشکەتنێن داویێ یێن سیاسی و ئەولەھیێ یێن سووریە و دەڤەرێ و رەوشا کوردان و پێکھاتەیێن دن ل سووریەیێ پێ رە نیقاش کرن.
سەرۆکاتیا ھەرێما کوردستانێ بەلاڤ کریە کو، سەرۆکێ ھەرێما کوردستانێ نێچیرڤان بارزانی پشتی نیڤرۆیا ئیرۆ رۆژا یەکشەمب، 15ێ شوباتا 2026ێ، د چارچۆڤەیا گەرا 62یێ یا کۆنفەرانسا ئەولەھیێ یا مونشنێ دە لگەل فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی جڤیا.
سەرۆکاتیا ھەرێما کوردستانێ ھەروەسا راگھاندیە کو، ھەر دو ئالیان د وێ جڤینێ دە پێشکەتنێن داویێ یێن سیاسی و ئەولەھیێ یێن سووریە و دەڤەرێ و رەوشا کوردان و پێکھاتەیێن دن ل سووریەیێ نیقاش کرنە.
وێ راگھاندنێ ئەشکەرە ژی کریە کو، نێچیرڤان بارزانی تەکەز ل سەر گرینگیا بەردەوامیا دیالۆگ و ھەڤفێمکرنێ ژ بۆ چارەسەرکرنا سیاسی یا پرسگرێکێن سووریەیێ کر، ب رەنگەکی کو مافێن کوردان و ھەمی پێکھاتەیان د چارچۆڤەیا سووریەیەکا ھەڤگرتی و دەستوورا پاشەرۆژێ یا سووریەیێ دە پاراستی بن.
مەزلووم عەبدی ژی ژ ئالیێ خوە ڤە سپاسیا سەرۆک مەسعوود بارزانی و سەرۆکاتیا ھەرێما کوردستانێ کر، ژ بەر بزاڤێن وان یێن بەردەوام و رۆلا وان یا بباندۆر پێخەمەتی ئارامکرنا رەوشێ و گھیشتنا شام و ھەسەدێ ب لھەڤکرنا ئاگربەستێ.
خەتەرا سەرھلدانا داعشێ و گەفێن تەرۆرێ ژی مژارێن تەوەرەکێ دنێ وێ جڤینێ بوون.
