مەزلووم عەبدی: رۆلا کوردێن دیاسپۆرایێ د راوەستاندنا ئێریشان دە دیرۆکی بوو
فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی، پەیامەکا سپاسیێ ئاراستەیی کوردێن ل دیاسپۆرایێ کر و رۆلا وان یا د پاراستنا دەستکەفتان دە ب “گرنگ و دیرۆکی” بناڤ کر.
فەرماندارێ گشتی یێ ھەسەدێ مەزلووم عەبدی د پەیامەکێ دە بال کشاند سەر خوەنیشاندان و ھەلوەستێن دیپلۆماتیکێن کوردێن ل دەرڤەیی وەلات. عەبدی دیار کر، ئەڤ چالاکیێن ل وەلاتێن جودا، بوون سەدەما زەختەکا مەزن یا ناڤدەولەتی و بوون فاکتۆرا سەرەکی یا راوەستاندنا وان ئێریش و پلانێن کو ل دژی ھەرێمێ ھاتبوون ئامادەکرن.
مەزلووم عەبدی د پەیاما خوە دە گۆت: “ئەم سپاسیا کوردێن دیاسپۆرایێ دکن ژ بۆ پشتگریا وان یا بەردەوام. خوەنیشاندان و ھەلوەستێن وەیێن نەتەوەیی، رۆلەکێ دیارکەر و مەزن لیست د راوەستاندنا وان ئێریش و پەلەمارێن کو دھاتن سەر ھەرێما مە.”
فەرماندارێ ھەسەدێ ھەر وھا دەستنیشان کر، دەنگێ کوردێن ل دیاسپۆرایێ د ناڤەندێن بریاردانێ یێن جیھانێ دە بوویە پشتگریەکا بھێز ژ بۆ ھێزێن پاراستنێ. ھەروھا تەکەز کر کو ئەڤ یەکتیا گەلێ کوردا ل ھوندر و دەرڤە، ھەر دەم دبە ئاستەنگ و بەربەست ل پێشیا وان پیلانێن کو ئەولەھی و ئارامیا ھەرێمێ دکن ئارمانج.
ئەڤ پەیاما مەزلووم عەبدی پشتی وێ تێ، د دەمێن داوی دە ب ھەزاران کوردێن ل ئەورۆپا و ئامەریکایێ ژ بۆ پشتگریا ب رۆژئاڤایێ کوردستانێ رە داکەتبوون قادان و بانگ ل جڤاکا ناڤدەولەتی کربوون کو رێ ل بەر ئێریشێن نوو بگرن.
