تركیه یاسایەکە تایبەت ب چەکدارێن پهكهكێ ڤه دهردخینه
د چارچۆڤەیا پێڤاژۆیا ئاشتیێ یا ل ترکیەیێ دە، ئامادەکاریا یاسایەکە تایبەت یا ب ناڤێ «یاسایا چارچۆڤەیێ» تێ کرن کو تەنێ ئەندام و گرتیێن پهكهكێ ل خوە دگرە. تێ چاڤەرێکرن کو ب ڤێ یاسایێ رە رێ ل بەر «مافێ هێڤیێ» ژ بۆ عهبدوللا ئۆجالان ژی ڤەبە.
ل گۆری ئاگاهیێن ژ ناڤا پەرلەمانا ترکیەیێ، کۆمیسیۆنا دەمۆکراسی، براتی و یەکتیا نەتەوەیی پێشنیارا یاسایەکە دەمکی یا ب ناڤێ «یاسایا چارچۆڤەیێ» کریە. ئەڤ یاسا ب تایبەتی ژ بۆ گرتی و چەکدارێن پارتیا کارکەرێن کوردستانێ (پهكهكێ) تێ ئامادەکرن.
سەدەما تایبەتبوونا ڤێ یاسایێ ئەوە کو پهكهكێ ب فەرمی خوە هلوەشاندیە و چەک دانینە؛ لەوما ئەڤ یاسا ئەندامێن تو رێخستنێن دن ل خوە ناگرە.
گرتی دێ د دەرڤە دە جەزایێ خوە بقەدینن
ل گۆری مەدیایا ترکیەیێ، ئەڤ یاسایا نوو دێ دەرفەتێ بدە گرتیێن کو سالێن درێژ د زیندانێ دە مانە کو مایینا جەزایێ خوە ل دەرڤەیی گرتیگەهێ دەرباس بکن. هەر وها ژ بۆ گرتیێن کو جەزایێ هەتا-هەتایێ ل وان هاتیە برین، ئەگەر 25 سالێن خوە تەمام کربن، دێ ب شەرتێ “چاکسازیێ” دەریێ ئازادیێ ل بەر وان وەرە ڤەکرن.
