فەرمان ژ سەبری ئۆک و بەسێ ھۆزات چوو، جڤینا گشتی یا مەزلووم عەبدی ھاتە هەلوەشاندن
مەزلووم عەبدی راگھاند جڤینا کو ئەو دا لگەل کوردێن ل ئالمانیا کت “ژ بەر سەدەمێن کو نە د دەستێ وی دە نە” ھاتییە هەلوەشاندن.
فەرماندارێ گشتی یێ ھەسەدێ مەزلووم عەبدی لگەل شاندەیا سووریێ ھاتبوو ئالمانیا دا کو بەشداری کۆنفەرانسا ئەولەھیێ یا مونشنێ ببە. عەبدی، کو تێ پێشبینی کرن چەند رۆژێن دن ل ئالمانیا بمینە، بریار بوو کو لگەل کوردێن ل ور بجڤە و جڤینان ل دار بخە. لێ بەلێ عەبدی بەتالکرنا جڤینێ راگھاند. د داخویانیەکێ دە ژ بۆ چاپەمەنیێ، عەبدی گۆت، “گەلێ مەیێ ھێژا ل ئەورۆپایێ، دڤیابوو ئیرۆ لگەل وە من ھەڤدیتنەک کربا. مە خوە ئامادە کربوو. لێ ژ بەر ھندەک سەدەمێن کو نە د دەستێ مە دە، مە نەکاری ڤێ بکن. ئەز ژ بۆ ڤێ یەکێ لێبۆرینێ دخوازم.” مەزلووم عەبدی ل سەر “سەدەمێن کو نە د دەستوی دە بوون” چ ھوورگلی نەدا.
چاڤکانیێن کو دارکا مازی ل ئەورۆپایێ پێ رە تێکلی دانی دیار کرن کو فەرمانا “جڤینێ ل دار نەخن” ژ قەندیل و ئیمرالیێ ھاتیە. چاڤکانیێن نێزیکی پەکەکێ ل ئەورۆپایێ ئەشکەرە کرن کو بەسێ ھۆزات و سەبری ئۆک، ئەندامێن رێڤەبەریا پەکەکێ یا ھلوەشیایی، فەرمانەک نڤیسکی ژ بۆ رێڤەبەریا خوە یا ل فرانسایێ شاندنە.
ل گۆری چاڤکانیان، د فەرمانێ دە ئەڤ داخویانی ھەبوون: “تێ زانین کو گەلەک ھێز دخوازن ل شونا رێبەر ئاپۆ کەسەکی دن دەستنیشان بکن. جڤینێن گشتی یێن نھا یێن مەزلووم عەبدی دێ ھلمەتا ل دژی رێبەرتیا مە خورت بکن و ببن سەدەما کو ئەو وەکی ئەلتەرناتیفەک ژ بۆ رێبەرتیێ وەرە پێشکێش کرن. ھەم کۆمیتەیا چاپەمەنی و وەشانان و ھەم ژی رێڤەبەریا مە دڤێت بالدار بن کو د ڤێ پێڤاژۆیێ دە کەسایەتەک سیاسی یا وسا نەئافرینن. ژ بەر ڤێ یەکێ، نە گونجاوە کو ھەڤال شاھین لگەل رایا گشتی جڤینێ لداربخە. وەکی دن، دڤێت چاپەمەنی جڤینا مونشنێ و ھەڤالێن کو ل سەر ناڤێ رۆژئاڤا بەشدار بوون زێدە دەرنەخن پێش. ل سەر ڤێ مژارێ ژ کۆمیتەیا چاپەمەنی و وەشانێ رە دێ پەرسپەکتیفەکا نوو وەرە شاندن.”
تێ گۆتن کو سەبری ئۆک و بەسێ ھۆزات پشتی نامەیا ئۆجالان یا 27ێ شوباتێ چوونە ئیمرالیێ و ل ور وەکی سکرتەریا ئۆجالان کار کرنە. ل گۆری ئاگاھیان سەبری ئۆک و ھۆزات تەعلیماتێن کو ژ ئیمرالییێ بۆ پەکەکەیا ھلوەشاندی تێن دگەھینن و ھەمژی پێڤاژۆیا سییاسی دمەشینن. ژ بەر ڤێ یەکێ، نێرینا سەردەست ئەوە کو ژ بەر پۆلیتیکایا “پێشیگرتنا ئالتەرناتیفا ئۆجالان” دژی مەزلووم عەبدی ھەلوەستەکا وھا ھاتییە نیشاندان.
