پارێزگارێ حەسەکەیێ چەند رێکار بۆ باشترکرنا ئاستێ تەناھی و خزمەتکاریان راگھاندن
پارێزگارێ حەسەکەیێ نوورەدین ئەحمەد چەند پێنگاڤ ژ بۆ ڤەژاندنا ئاستا خزمەتکاری و برێڤەبرنێ ل وێ پارێزگەھێ راگھاندن، ھەروەسا تەکەز ل سەر بەردەوامیا پێکانینا پاکێتەکێ ژ پلانان ژی کر کو ئارمانج ژێ بلندکرنا ئاستێ تەناھی و ھێسانکاریێن ژ بۆ کارووبارێن وەلاتیان د سەکتۆرێن جودا جودا دەیە.
پارێزگارێ حەسەکەیێ د داخویانیەکێ دە ئەشکەرە کر کو، ھەمی رێیێن کو دچن باژارێ حەسەکەیێ دێ سبە رۆژا یەکشەمب، 22یێ شوباتا 2026ێ، بێن ڤەکرن. ئەڤ ژی پشتی تەمامکرنا رێکارێن پێدڤی ژ بۆ پشتراستبوونا ژ ئەولەھیا ھاتن و چوونێ تێ کرن.
نوورەدین ئەحمەد ئاماژە دا وێ یەکێ ژی کو، ئیرۆ رۆژا شەمی، 21ێ شوباتا 2026ێ، د چارچۆڤەیا بزاڤێن ژ بۆ تەمامکرنا کارێن بالافرخانەیا ناڤنەتەوەیی یا قامشلۆیێ دە، شاندەیەکا تەکنیکی دێ ژ شامێ بگھیژە حەسەکەیێ.
ناڤبری رۆن ژی کر کو، کۆمیتەیەکا تایبەتمەند ل قایمقامیێ چاڤدێریا پێڤاژۆیا یەککرنا دەزگەھێن گشتی ژ بۆ بازرگانیا گەنم و بەرهەمئینانا گەنم کریە، ژ بلی ڤەگەراندنا کارمەندێن کو ژ کار ھاتنە دەرخستن ژ بۆ سەر کارێن وان ل گۆری رێکارێن قانوونی. ھەروەسا گۆت کو، رێنمایی ھاتنە دایین کو ئیرۆ ھەژمارەکا گرتیان ل حەسەکەیێ سەربەست بێن بەردان.
پارێزگارێ حەسەکەیێ ھەروەسا دەستپێکرنا گەشتێن بەژایی یێن د ناڤبەرا حەسەکەیێ و شامێ دە ژی راگھاند، کو دێ ژ بۆ خورتکرنا تێکلیان و ھێسانکاریێن ژ بۆ ھاتن و چوونا وەلاتیان و کەلووپەلان ببە ئالیکار. تەکەز ژی کر کو، د قۆناغا بهێت دە پێنگاڤێن کریارکی دێ زێدەتر بن، ژ بۆ ڤەژاندنا سەکتۆرێن خزمەتکاریان یێن جودا جودا ب مەرەما دابینکرنا پێدڤیتیێن خەلکێ وێ پارێزگەھێ.
سەرۆکێ سووریەیێ ئەحمەد شەرع بەری چەند رۆژان فەرمانا ھەژمار 30 یا سالا 2026ێ دەرخست و تێ دە نوورەدین ئەحمەد عیسا وەک پارێزگارێ حەسەکەیێ دەستنیشان کر.
