ئیرانێ جەزایێ بدارڤەکرنێ یێ 2 جوانێن کورد پەژراند

دادگەها بلند یا ئیرانێ بریارا دادگەها شۆرەشێ یا مەهابادێ یا ژ بۆ بدارڤەکرنا 2 جوانێن کورد پەسەند کر.

ئەو جوان ژ بۆکانێ نە و پشتی خوەنیشاندانێن سالا 2022یان هاتبوون دەستەسەرکرن.

رێخستنێن مافێن مرۆڤانێن رۆژهلاتێ کوردستانێ راگهاند کو جەزایێ بدارڤەکرنێ یێ وان هەر دو جوانان ژ ئالیێ دادگەها بلند یا ئیرانێ ڤە هاتیە پشتراستکرن.

ل گۆری ئاگاهیان، رەئووف شێخ مەعرووفی و محەمەد فەرەجی دوهـ ژ ڤێ بریارێ هاتنە ئاگاهدار کرن.

ئەو هەر دو جوان نها ل گرتیگەها ناڤەندی یا بۆکانێ گرتینە.

رەئووفێ 23 سالی 26ێ کانوونا پێشینا 2022یان هاتبوو دەستەسەرکرن.

هەر وها محەمەدێ 24 سالی ژی 21ێ سباتا 2023یان هاتبوو دەستەسەرکرن.

شاخا یەکەما دادگەها شۆرەشێ یا مەهابادێ جەزایێ بدارڤەکرنێ دابوو وان هەر دو جوانان.

ئەو ب تۆهمەتێن “دژمناتیا ل هەمبەری خوەدێ” و “دەرخستنا فتنە و فەسادیێ یا ل سەر روویێ ئەردێ” هاتبوون جەزاکرن.

ل گۆری ئامارێن رێخستنا مافێن مرۆڤانا ئیرانێ (هرانا)، ژ دەستپێکا سالا 2025ان هەتا داویا سالێ ل ئیرانێ هەزار و 922 کەس ب تۆهمەتێن جودا هاتنە بدارڤەکرن.