ل قامشلۆ مالباتێن شەرڤانێن ھەسەدێ یێن وندا دپرسن: کورێن مە ل کوو نە؟!
ل باژارێ قامشلۆ یێ رۆژئاڤایێ کوردستانێ، ب دەھان مالباتێن شەرڤانێن ھێزێن سووریەیا دەمۆکراتیک (ھەسەدێ) ل بەر ئاڤاھیا نەتەوەیێن یەکگرتی خوەپێشاندانەک ل دار خستن. مالبات داخوازا ئاشکەرەکرنا چارەنڤیسا کورێن خوە دکن یێن کو د شەرێن داوی ل گەل ھێزێن حکوومەتا سووریەیێ دە، دیل کەتنە یان ژی وندا بوونە.
خوەپێشاندەران ب ھلدانا وێنە و پانکارتان بانگ ل نەتەوەیێن یەکگرتی و رێخستنێن مافێن مرۆڤان کرن کو فشارێ ل حکوومەتا شامێ بکن، داکو گرتی و دیلان ئازاد بکە. ھەر وھا مالبات ژ بۆ کێم ئاگاھی و بێدەنگیا بەرپرسان ژی ب گازنجن.
دایکەکە کو د خوەپێشاندانێ دە بوو بال کشاند سەر کورێ خوەیێ کو ل ھەرێما دێر حافرێ وندا بوویە و گۆت: “وە کورێ من ژ بۆ چ بر ناڤا عەرەبان؟ ل دێر حافرێ چ دکر؟ کی دێ بەرسڤا من بدە؟ ئەز ت تشتی ناخوازم، ئەز تەنێ کورێ خوە دخوازم. گەلۆ نھا مرییە یان زندییە؟”
چارەنڤیسا ب سەدان شەرڤانان نەناسە
پشتی ئێریشێن داوی یێن ئارتێشا سووریەیێ بۆ سەر خالێن ھەسەدێ ل گوندەوارێن حەلەب، رەقا و دێرەزۆرێ، ئالۆزی د ناڤبەرا ھەر دو ئالیان دە زێدە بوون. ل گۆری ئاگاھیان، ب سەدان شەرڤانێن ھەسەدێ د ڤان روودانان دە ژ ئالیێ ھێزێن حکوومەتێ ڤە ھاتنە گرتن یان ژی د دەما ڤەکشینێ دە وندا بوونە.
مالباتێن گرتیان تەکەز دکن، ھەتا ھەموو دیل نەیێن بەردان و چارەنڤیسا ونداھیان نەیێ ئەشکەرە کرن، ئەو دێ چالاکیێن خوە بەردەوام بکن. ئەو داخواز ژ فەرمانداریا ھەسەدێ ژی دکن کو ب ئاوایەکی جدیتر ل سەر ڤێ دۆسیایێ بخەبتە و مالباتان ئاگاھدار بکە.
