مەدیایا ئیسرایلێ: گەلەک دەزگەھێن حکوومەتێ و بنگەھێن لەشکەری یێن ئیرانێ ھاتنە ئارمانجکرن

مەدیایا ئیسرایلێ راگھاند کو، بالافرێن شەری یێن ئیسرایلێ ب ھەڤپاریا ئامەریکایێ ئێریشا ئاسمانی کر سەر بالافرخانەیا ناڤنەتەوەیی یا تەھرانێ و گەلەک دەزگەھێن حکوومەتێ و جھێن لەشکەری ل ئیرانێ و گەلەک بەرپرسێن پایەبلندێن ئیرانێ کرنە ئارمانج.

وەزیرێ بەرەڤانیێ یێ ئیسرایلێ ئیسرائیل کاتز راگھاند: مە ل سەرێ سبەھا ئیرۆ رۆژا شەمبی، 28ێ شوباتا 2026ێ، ئێریشەکە پێشوەخت ل دژی ئیرانێ دا دەستپێکرن و مە گەلەک جھێن سەربازی و دەزگەھێن حکوومەتێ کرنە ئارمانج.

ھەر چەند سەرۆکێ ئامەریکایێ دۆنالد ترامپ هێژ ب رەنگەکێ فەرمی رانەگھاندیە کا ئەو ئەو تەڤلی وێ ئێریشێ بوونە یان نا، لێ ھەژمارەکا بەرپرسێن واشنتۆنێ ژ مەدیایا وەلاتێ خوە رە راگھاندیە کو، ئەو ئێریش ب ھەڤپاری د ناڤبەرا ئیسرایل و ئامەریکایێ دە تێن کرن.

ل گۆری مەدیایا ئیرانێ، ژ سبەھا ئیرۆ رۆژا شەمبی، 28ێ سباتا 2026ێ ڤە گەلەک جھێن لەشکەری و سڤیل ل تەھرانا پایتەخت و باژارێن ئەسفەھان، قوم، کەرەج و تەبریزێ ھاتنە ئارمانجکرن. بەحسا وێ یەکێ ژی تێ کرن کو، بالافرخانەیا ناڤنەتەوەیی یا تەھرانێ ژی ھاتیە بۆمبەبارانکرن.

ل گۆری چاڤکانیێن مەدیایێ، ھەتا نھا گەلەک بەرپرسێن پایەبلندێن لەشکەرێن ئارتێشا پاسداران ھاتنە ئارمانجکرن، لێ ئیرانێ ب رەنگەکێ فەرمی کوشتنا چ بەرپرس و فەرماندارێن خوەیێن لەشکەری رانەگھاندیە.

د بەرسڤا وان ئێریشان دە، ئیرانێ ئاسمانێ خوە ب تەڤاھی ل بەر گەشتێن ئاسمانی داخست و بۆرسەیا تەھرانێ ژی ھاتیە داخستن.

بەرپرسەکی ئیرانێ ژی ژ ئاژانسا رویتەرسێ یا نووچەیان رە راگھاندیە کو، ئیران ژ بۆ بەرسڤەکا وێرانکەر خوە ئامادە دکە و تەنێ ئەو دێ سەر بقەدینن.

ھەروەسا مەدیایا ئیسرایلێ ژی راگھاندیە کو، تەڤاھیا ئاسمانێ وی وەلاتی ھاتیە داخستن و ھەمی گەشتێن ئاسمانی یێن چوون و ھاتنێ ژ بۆ ئیسرایلێ ھاتنە ھلوەشاندن. بەرپرسێن وی وەلاتی ژی رەوشا ئاوارتە راگھاندیە و دەواما حکوومەتێ، ناڤەندێن خوەندنێ داخستنە و ژ وەلاتیان خوەستیە کو ژ مالێن خوە دەرنەکەڤن.

ل گۆری مەدیایا ئیسرایلێ، ئەو ئێریش کو ل سەرێ سبەھا ئیرۆ ل دژی ئیرانێ ھاتنە کرن قۆناغا یەکێ بوو و ئێریشێن ئاسمانی دێ ب چەند قۆناغێن دن بەردەوام بن و تێ پایین کو ژ بۆ دەما 48 دەمژمێران بەردەوام بن.